Latine Loquor - Liber Quīntus - Colloquium Tertium
Puer ā patre commendātur praeceptōrī. Vērus amor patris in fīlium. Corrēctiō necessāria puerō. Hortātiō ad dīligentiam. Exemplum puerī studiōsī et oboediēntis.
Persōnae:
Bonifācius, Claudius.
Bonifācius, Claudius.
Bonifācius
Audīvī patrem tuum vēnisse hodiē in gymnāsium.
Claudius
Vērum audīvistī.
Bonifācius
Cuius reī vēnerat grātiā?
Claudius
Ut prō meīs alimentīs praeceptōrī numerāret pecūniam: simul ut mē illī commendāret.
Bonifācius
Numquamne tē commendāvit?
Claudius
Immō saepissimē.
Bonifācius
Quid sibi vult ista commendātiō tam frequēns?
Claudius
Amōre vērō mē prōsequitur.
Bonifācius
Quid tum?
Claudius
Ideō cupit mē dīligenter ērudīrī.
Bonifācius
Quid sī commendet, ut saepius vapulēs?
Claudius
Ea est fortasse causa: sed quid inde? Nōn proptereā mē dīligit minus.
Bonifācius
Unde istud colligis?
Claudius
Quia puerō tam necessāria est corrēctiō, quam alimentum.
Bonifācius
Vērum quidem dīcis: sed paucī ita iūdicant. Nēmō etiam est, quīn pānem, quam virgam, mālit.
Claudius
Hōc est nātūrāle omnibus: quis neget? Sed tamen patienter ferenda est poena, praesertim iūsta.
Bonifācius
Haec habētur in libellō mōrālī sententia: «Quod meritō pateris, patienter ferre mementō». Sed quid sī poena sit iniūsta?
Claudius
Ea quoque patienda est nihilōminus.
Bonifācius
Ō utinam id nōbīs in mentem venīret, quotiēs aliquid patimur.
Claudius
Praeceptor id nōs saepe monet, quotiēs occurrit occāsiō.
Bonifācius
Ergō dēmus operam, ut sīmus posthāc dīligentiōrēs.
Claudius
Ita faciat Deus.
Ēlocūtiō
- Numerāre hospitī pecūniam prō alimentīs.
- Solvere alicui pretium convictūs.
- Commendāre aliquem alicuī ... aliquem dē meliōre notā.
- Quam dīligentissimē ... commendāre aliquem alterīus fideī.
- Commendārī alicuī.
- Quid sibi vult commendātiō tam frequēns?
- Prōsequī aliquem amōre vērō.
- Cupit mē dīligenter ērudīrī.
- Corrēctiō puerīs necessāria est.
- Nēmō est, quīn pānem, quam virgam mālit.
- Poena etiam iniūsta ferenda.
- Quod meritō pateris, patienter ferre mementō.
- Occāsiō occurrit.
- Surdō narrās fābulam.
- Ita Deus faciat.
- Prōverbium vulgī sermōne trītum.
- Interesse ōrātiōnī dē rēbus dīvīnīs habitae.
- Occupātus eram in scrībendīs litterīs ad mātrem ... in vinēmiīs.
- Litterās scrībendō occupātus.
- Differre negōtium.
- Urgēbat mē tabellāriī festīnātiō.
- Omnia Deō postpōnenda ... dīvīnīs rēbus omnia postpōnenda sunt.
- Saepe Deum terrēnīs postpōnimus.
- Deus spīritū suō immūtet nōs.
- Postpōnere aliquem alicuī.
- Omnia postposuī, dummodo praeceptīs patris pārerem.
- Audītōrium fuit frequēns prō mōre.
- Frequēns est cum eō.
- Impendere labōrem alicui reī ... in aliquam rem.
- Hominēs glaebae affīxī sunt.
- Impendere biennium alicui reī ... studium alicui reī ... pecūniam in aliquam rem ... sūmptum ad aliquid ... tempus studiīs.
- Dē hōc nōn est meum tibi reddere ratiōnem.
- Turpe est doctōrī, cum culpa redarguit ipsum.
- Impingere colaphum alicuī ... implēre caput colaphīs.
- Impingere caput parietī.