Latine Loquor - Liber Quārtus - Colloquium Quīnquāgēsimum Secundum
Quīdam puer patris nōmine praeceptōrem in hortōs invītat, praeceptor obiter aliquid docet ad mōrēs pertinēns.
Persōnae:
Adolphus, Praeceptor.
Adolphus, Praeceptor.
Adolphus
Praeceptor, salvus sīs.
Praeceptor
Auspicātō advenīs: quid nūntiās?
Adolphus
Ōrat tē pater meus, ut animī causā eāmus ūnā in hortōs suōs suburbānōs.
Praeceptor
Ad eam rem nōs invītat serēnitās, et nunc sumus fēriātī. Sed quid illīc aspectū iūcundum vidēbimus?
Adolphus
Variās et pulchrās arborēs cum frūctibus suīs item herbārum et flōrum mīram varietātem.
Praeceptor
Nihil est illīs rēbus hōc tempore iūcundius.
Adolphus
Ea est Deī ergā nōs beneficentia.
Praeceptor
Quam quidem assiduīs laudibus prōsequī dēbēmus.
Adolphus
Sed vereor, nē patrī in morā sīmus.
Praeceptor
Tantisper exspectā, dum togam mūtem, ut sim ad ambulandum expedītior. Iam parātus sum: nunc eāmus. Sed estne domī pater?
Adolphus
Prae foribus nōs exspectat.
Praeceptor
Bene rēs sē habet: vidē, ut eum decenter salūtēs.
Adolphus
Dē hōc, tē docente, saepe admonitī sumus.
Ēlocūtiō
- Salvus sīs, reverende Domine Pāstor.
- Salvē, salūs tibi, salvēre tē iubeō, bene sit tibi, salvēte pāriter omnēs.
- Optō tibi salūtem plūrimam.
- Auspicātō advenīs.
- Animī causā.
- Caelī serēnitās invītat nōs ad deambulandum.
- Hominēs male fēriātī.
- Vidēbimus aliquid aspectū iūcundum.
- Mīram vidēbimus flōrum varietātem.
- Nihil vērē iūcundius.
- Prōsequī aliquem assiduīs laudibus, odiō, honōre.
- Vereor, nē sim tibi in morā ... nē sim tibi impedīmentō.
- Parātus ad deambulandum.
- Prae foribus tē exspectābō.
- Salūtāvī pāstōrem decenter.
- Admonērī dē rē aliquā.
- Praeceptōre docente ego dormiēbam.