Latine Loquor - Liber Quārtus - Colloquium Quīntum

Quīdam paedagōgus discipulum ēdūcit ambulātum. Exercitātiō corporis, Socratis apophthēgma. Ambulātiō fit propter comitēs iūcundior. Exemplum honestae remissiōnis in studiīs.

Persōnae:
Paedagōgus, Benedictus discipulus.
Paedagōgus
Heus! Benedicte.
Benedictus
Hem, praeceptor.
Paedagōgus
Pōne librōs: iam satis tōtō diē studuistī: parā tē, ut eāmus ambulātum.
Benedictus
Nōnne post cēnam praestāret?
Paedagōgus
Salūbrior est ante cibum exercitātiō corporis.
Benedictus
Meminī ex tē audīvisse.
Paedagōgus
Narrā Socratis dictum in eam sententiam.
Benedictus
Cum Socrātēs usque ad vesperam contentius ambulāret, interrogātus quārē id faceret, respondit sē, quō melius cēnāret, obsōnāre famem ambulandō.
Paedagōgus
Probē meministī, quis auctor?
Benedictus
Cicerō. Sed quō prōdībimus, praeceptor?
Paedagōgus
Extrā urbem.
Benedictus
Mūtābōne calceōs?
Paedagōgus
Mūtā, nē istōs novōs pulvere cōnspergās, sūme etiam umbellam, nisi māvīs sōlem tibi īnfuscāre faciem.
Benedictus
Iam parātus adsum.
Paedagōgus
Nunc sānē prōdeāmus.
Benedictus
Vocābōne ex vīcīniā ūnum aut alterum comitem?
Paedagōgus
Rēctē admonēs: sīc enim iūcundior erit deambulātiō, nam per viam sermōnēs inter vōs cōnferētis, et in umbrā collūdētis alicubī.
Benedictus
Sīc etiam excitābitur cibī appetentia.
Paedagōgus
Ego lentō gradū praecēdam: ubi nactus eris comitēs, vōs mē per portam rīpāriam sequiminī.
Benedictus
Nōs igitur illīc exspectābis?
Paedagōgus
Certō.
Benedictus
Quid sī nūllōs invenerō?
Paedagōgus
Nihilōminus sequere mē, audīstī?
Benedictus
Audīvī, praeceptor.

Ēlocūtiō

⟵ Previous Next ⟶