Latine Loquor - Liber Quārtus - Colloquium Quadrāgēsimum Prīmum
Ītūrus domum ob levem causam, nōn impetrat, adeōque obiūrgātur. Exemplum observātū dignum, nē puerī cursitāre temerē permittantur.
Persōnae:
Rudolphus, Praeceptor.
Rudolphus, Praeceptor.
Rudolphus
Licetne prōdīre?
Praeceptor
Quō?
Rudolphus
Domum.
Praeceptor
Hem, tam saepe itāre domum.
Rudolphus
Māter iussit, ut ego et frāter sē adīrēmus hodiē.
Praeceptor
Cuius reī grātiā?
Rudolphus
Ut ancilla vestīmenta nōbīs excuteret.
Praeceptor
Quid istud? Suntne vōbīs maculae?
Rudolphus
Et multae quidem.
Praeceptor
Cūr uxōrem meam nōn admonuistis?
Rudolphus
Nōn ausī sumus.
Praeceptor
Quasi vērō illa sit ūsque adeō difficilis. Ancillam habet eā potissimum grātiā, ut vestrum omnium cūret munditiem: nec vōs ignōrātis hōc, sed gaudētis mātris invīsendae occāsiōnem vōbīs darī. Vōs igitur manēte: crās ego cūrābō, ut vōbīs excutiantur vestēs.
Rudolphus
Sed māter nōs obiūrgābit.
Praeceptor
Egomet eam placābō, quiēscite.
Ēlocūtiō
- Itāre domum.
- Māter iussit, ut adīrem sē.
- Ancilla excussit mihi vestīmenta.
- Excutere alicui lacrimās ... aliquem sellā.
- Multae frātrī tuō sunt maculae ... habet multās frāter tuus maculās.
- Nōn ausus sum mātrem admonēre dē pāne.
- Uxor praeceptōris difficilis nōn est.
- Eā potissimum grātiā parentēs habent ancillās, ut cūrent puerōrum munditiem.
- Gaudeō mihi darī occāsiōnem invīsendae mātris.
- Gaudeō, quod mihi datur occāsiō invīsendī mātrem.
- Obiūrgāre aliquem.
- Placāre aliquem ... reprehendere aliquem.
- Placāre īram alicuius.