Latine Loquor - Liber Quārtus - Colloquium Trīcēsimum
Iturī ad nūptiās, prīdiē veniam petunt, ut domī vestīmenta mūtent: admonentur paucīs ā praeceptōre.
Persōnae:
Mārcus, Praeceptor.
Mārcus, Praeceptor.
Mārcus
Licetne, praeceptor, ut ego et patruelis eāmus domum?
Praeceptor
Quid eō?
Mārcus
Ad nūptiās cōnsobrīnae.
Praeceptor
Quandō fient nūptiae?
Mārcus
Crāstinō diē.
Praeceptor
Cūr tam citō vultis īre?
Mārcus
Ut mūtēmus vestīmenta.
Praeceptor
Per mē licet, eātis hāc tamen lēge, ut crās hūc redeātis cubitum.
Mārcus
Quid sī voluerit patruus, ut exspectēmus repōtia?
Praeceptor
Nōn dētinēbit vōs, satis sciō, dummodo dīcātis eī, quā lēge dīmīserim.
Mārcus
Vērum fatēbimur.
Praeceptor
Abīte et ab omnī cavēte intemperantiā: faciteque, ut lūceat lūx vestra cōram omnibus, unde glōria nostrī illius caelestis Patris celebrētur.
Mārcus
Ita quidem spērāmus fore, ipsō nōs in omnibus adiuvante.
Ēlocūtiō
- Īre ad nūptiās; facere, parāre, adōrnāre, apparāre nūptiās.
- Nūbere alicui.
- Soror tua nūpsit frātrī meō ... coniūncta est cum frātre meō.
- Nūbere in familiam clāram.
- Dūcere vel assūmere aliquam in mātrimōnium ... iungere sibi mātrimōniō.
- Mūtāre vestīmenta ... calceōs.
- Hāc lēge dīmittō vōs, ut mātūrētis reditum.
- Cavēte vōbīs ab omnī intemperantiā.
- Glōriam alicuius celebrāre.