Latine Loquor - Liber Quārtus - Colloquium Duodēvīcēsimum
Duo aut trēs ex domesticīs discipulīs praeceptōrem māne salūtātum veniunt, ut sciat, an omnēs surrēxerint. Admonitiō praeceptōris. Exemplum dīligentiae observātū dignum.
Persōnae:
Frānciscus ūnus ē discipulīs, Praeceptor.
Frānciscus ūnus ē discipulīs, Praeceptor.
Frānciscus
Salvē, praeceptor.
Praeceptor
Salūs per Iēsum Chrīstum. An surrēxērunt omnēs?
Frānciscus
Omnēs, praeter parvulōs.
Praeceptor
Num aliquis aegrōtat?
Frānciscus
Nēmō, beneficiō Deī.
Praeceptor
Quid agitur?
Frānciscus
Aliī sē induunt: aliī iam student nāviter.
Praeceptor
Adestne vōbīs hypodidascalus?
Frānciscus
Iam dūdum.
Praeceptor
Īte igitur precātum: vōsque dīligenter commendāte Dominō Deō per Iēsum Chrīstum dēprecātōrem nostrum: deinde pergite in studiīs vestrīs usque ad hōram ientāculī.
Frānciscus
Ita solēmus, praeceptor.
Praeceptor
Crēdō equidem: sed quia ferē somniculōsī estis ac neglegentēs, idcircō ego vōs admoneō saepius.
Frānciscus
Grātiam habēmus, praeceptor hūmānissimē. Aliquidne vīs praetereā?
Praeceptor
Dīc famulō, ut mihi togam afferat.
Ēlocūtiō
- Salvē, salvus sīs.
- Parvulī nōndum surrēxērunt.
- Quid agitur? Sedētur, discitur, scrībitur.
- Induere sē; novās vestēs.
- Studēre nāviter, vel gnāviter.
- Īre precātum.
- Commendāre sē Deō.
- Praeceptōrī prō meritīs tē commendāvī.
- Lūdere usque ad hōram cēnae ... in sērum diēī, usque ad vesperum.
- Somniculōsus ac neglegēns.
- Somnō valdē dēditus ... somnī mancipium, somnolentus.