Latine Loquor - Liber Quārtus - Colloquium Septimum Decimum
Admonitus lūdimagister dē classe doctōre vacuā statim prōvidet.
Persōnae:
Frīderīcus famulus, Praeceptor.
Frīderīcus famulus, Praeceptor.
Frīderīcus
Praeceptor, nēmō est, quī doceat in sextā classe.
Praeceptor
Quid hōc reī est? Ubi est magister Philippus?
Frīderīcus
Morbō dētinētur in lectō.
Praeceptor
Quī scīs?
Frīderīcus
Nūntiāvit quīdam ex discipulīs eius domesticīs.
Praeceptor
Dīc hypodidascalō meō.
Frīderīcus
Nōn est in mūseō suō.
Praeceptor
Quī scīs?
Frīderīcus
Nam ego ter aut quater pulsāvī ostium.
Praeceptor
Dīc prīmae classis doctōrī, ut mittat ē suīs aliquem.
Frīderīcus
Quid sī nōlit mittere?
Praeceptor
Abī, ineptē: an putās eum esse tam imprūdentem, ut recūset? abī, properā.
Ēlocūtiō
- Dētinērī morbō.
- Quīdam ex discipulīs sextae classis nūntiāvit mihi omnēs discipulōs huius Gymnasiī hōrīs postmerīdiānīs agere fēriās.
- Ter aut quater pulsāvī ostium mūseī praeceptōris.
- Ter pulsāre licet, sī nōn aperitur, abitō.