Latine Loquor - Liber Tertius - Colloquium Septimum
Gabriel Germānum Chrīstiānē et hūmāniter admonet: eīdem bene ultrō facit. Cāritās. Verēcundia in petendō. Līberālis in dandō, petere quoque nōn dubitat.
Persōnae:
Gabriel, Germānus.
Gabriel, Germānus.
Gabriel
Miserētur mē tuī.
Germānus
Quid ita?
Gabriel
Quod lapide tam miserē abūtāris.
Germānus
Quōmodō abūtor?
Gabriel
Quia pessimē tractās eum in acuendō.
Germānus
Nōn est culpa mea, nōlī errāre.
Gabriel
Cuius igitur?
Germānus
Scalpellī meī, cuius aciēs obtūsa.
Gabriel
Scalpellum in culpā nōn est, sed tū ipse.
Germānus
Cūr istud dīcis?
Gabriel
Quia dēbuistī aut scalpellum tuum acuere, aut aliud aliunde rogāre commodātō, saltem ad praesēns negōtium.
Germānus
Nōn audeō petere.
Gabriel
Quid timēs?
Germānus
Nē mihi dēnegētur.
Gabriel
Ecce tibi meum.
Germānus
Grātiās agō.
Gabriel
Ūtere, quantum vīs, sed rēctē.
Germānus
Sciēns nōn abūtar.
Gabriel
Nec sīs posthāc tam verēcundus in petendō.
Germānus
Sīc est ingenium meum: soleō dare libentius quam petere.
Gabriel
Utinam multī essent tuī similēs! sed tamen quī libenter dat beneficium, is petere quoque līberē potest. Sed ego tē nimis dētineō: perfice, quod coepistī.
Ēlocūtiō
- Miserētur mē tuī.
- Tangor, moveor, ergā tē misericordiā ... misereor tuī ... miseror tē.
- Tenet mē tuī misericordia, commoveor, permoveor, capior misericordiā tuī.
- Misericors sum in tē.
- Abūtī rē aliquā.
- Pessimē tractāre aliquem.
- Christophorus pessimē tractāvit lapidem suum in acuendō.
- Nōn sum in culpā.
- Sum īnsōns culpae ... nōn sum compos culpae ... nōn est culpa mea.
- Nōlī culpam in mē trānsferre, mihi attribuere, assīgnāre, in mē conicere, mihi impōnere.
- Līberō eōs culpā.
- Aciēs scalpellī tuī obtūsa est.
- Acuere cultrum.
- Dare commodātō alicui aliquid.
- Rogāre, petere, accipere aliunde commodātō.
- Hanc pecūniam mūtuō accēpī; mūtuātus sum hanc pecūniam, crēdita est mihi haec pecūnia, mūtuō data.
- Dēnegāre alicui aliquid.
- Timeō, nē dēnegētur mihi.
- Ūtere meīs librīs, quantum vīs.
- Sciēns abūsus est pennā meā.
- Verēcundus in petendō.
- Sīc est ingenium meum.
- Hōc habeō ā nātūrā ... soleō libentius dare quam petere.
- Utinam multī essent tuī similēs; similēs mātrī, dissimilēs patrī.
- Dare beneficium alicui.
- Dētinēre aliquem spē inānī.
- Perfice quod coepistī.