Latine Loquor - Liber Tertius - Colloquium Sextum
Admonitōnem, bonam iuvenis bonus in partem bonam accipit, et grātiās habet monītōrī.
Persōnae:
Frānciscus, Fēlīx.
Frānciscus, Fēlīx.
Frānciscus
Quid fēcistī rēgulā meā?
Fēlīx
Relīquī in pergulā superiōre.
Frānciscus
Cūr eam relīquistī?
Fēlīx
Oblītus sum.
Frānciscus
Nōn rēctē factum: sed tū sīc ferē solēs, sī quid tibi fuerit commodātum.
Fēlīx
Piget mē neglegentiae meae.
Frānciscus
Nōn satis est dolēre, nisi mōrēs mūtāre velīs.
Fēlīx
Deum precābor, ut eōs mihi mūtāre velit.
Frānciscus
Sī sapīs: alioquī nēmō tibi posthāc commodābit.
Fēlīx
Habeō grātiam, quod mē tam amīcē monuerīs.
Frānciscus
Ī nunc repetītum meam rēgulam: est enim ea mihi opus ad dūcendās in chartā līneās.
Fēlīx
Nunc eō.
Frānciscus
Refer ad mē in cubiculum.
Fēlīx
Mox habēbis.
Ēlocūtiō
- Relīquī rēgulam tuam in pergulā superiōre.
- Oblīvīscī rem aliquam.
- Commodāre alicui aliquid ... ūtendum dare, dare commodātō.
- Piget mē neglegentiae tuae.
- Mūtāre mōrēs.
- Vulpēs mūtat pilōs, nōn mōrēs.
- Ī petītum librōs tuōs.
- Opus est mihi rēgulā ad dūcendās līneās in chartā.
- Refer ad mē rēgulam.
- Referre in adversāria aliquid ... in album.
- Referre respōnsum alicui.
- Referre in numerum bonōrum aliquem.