Latine Loquor - Liber Tertius - Colloquium Quīnquāgēsimum
Albertus percontātur dē rēbus ad Geōrgium pertinentibus.
Persōnae:
Albertus, Geōrgius.
Albertus, Geōrgius.
Albertus
Quō in statū sunt rēs vestrae Lugdūnēnsēs?
Geōrgius
Nesciō, iam prīdem nihil audīmus.
Albertus
Nihilne scrīpsit frāter tuus?
Geōrgius
Post mēnsēs duōs nihil litterārum mīsit, quod vīderit pater.
Albertus
Fortasse aegrōtat.
Geōrgius
Minimē vērō; nam tabellāriī saepe nōbīs salūtem nūntiant verbīs eius.
Albertus
Libenter audiō illum rēctē valēre. Valdē eum dīligō, quī fuit mihi suāvissimus condiscipulus.
Geōrgius
Ille, ut, opīnor, tē vicissim dīligit.
Albertus
Id vērō mihi nōn est dubium. Sed nōs hōra vocat: eāmus in auditōrium.
Geōrgius
Mātūrēmus. Iam recitātur catalogus.
Ēlocūtiō
- Quō in statū sunt rēs vestrae? Resp. Fēlīcī, prosperō, adversō.
- Nihilne litterārum accēpistī ex patriā?
- Nihilne litterārum ad tē missum est?
- Nūntiā praeceptōrī tuō verbīs meīs salūtem ... meō nōmine.
- Libenter audiō, frātrem tuum rēctē valēre.
- Geōrgius est mihi suāvissimus condiscipulus.
- Id nōn est mihi dubium ... dē hāc rē nihil dubitō.
- Dubium mihi est ... haereō, ambigō, in dubiō sum; addubitō, in dubium veniō.
- Veniō in dubium dē tuā fidē ... tua fidēs venit mihi in dubium.