Latine Loquor - Liber Tertius - Colloquium Quadrāgēsimum Prīmum

Ernestus Eusēbiō aegrōtantī suādet, ut quiēscat. Pāret Eusēbius.

Persōnae:
Ernestus, Eusēbius.
Ernestus
Quid trīstis es, Eusēbī?
Eusēbius
Aegrōtō.
Ernestus
Quid morbī est?
Eusēbius
Nesciō.
Ernestus
Sed tamen, estne gravis morbus?
Eusēbius
Nōn admodum, grātiā Deī.
Ernestus
Quidnam tibi dolet?
Eusēbius
Caput.
Ernestus
Quid? tōtumne caput?
Eusēbius
Nōn certē.
Ernestus
Quae pars igitur?
Eusēbius
Nesciō nōmen.
Ernestus
Estne vertex?
Eusēbius
Nōn est.
Ernestus
Quid ergō? utrum sinciput? an occiput?
Eusēbius
Haec pars anterior.
Ernestus
Est ergō sinciput.
Eusēbius
Quid igitur faciam?
Ernestus
Quiēsce bene: mox sānus eris. Sīc enim ā mātre accēpī nūllum esse praesentius remedium capitis dolōribus quam quiētem.
Eusēbius
Atque variī sunt morbī capitis.
Ernestus
Et varia fortasse remedia: sed quid est facilius, quam id tentāre, quod dīxī tibi?
Eusēbius
Experīrī quidem nihil, ut spērō, nocēbit: sed ubi quiēscam?
Ernestus
Domī vestrae in lectō.
Eusēbius
Māter nōn sinet.
Ernestus
Immō, sī dīxerīs tē aegrōtāre.
Eusēbius
Atquī mē putābit simulāre.
Ernestus
Fierī potest: sed quid dubitās perīculum facere?
Eusēbius
Bonum cōnsilium.
Ernestus
Ūtere, sī vīs.
Eusēbius
Faciam profectō.
Ernestus
Ēnimvērō, sī sapīs.
Eusēbius
Sed ūnum restat.
Ernestus
Quid est?
Eusēbius
Impetranda est ā praeceptōre venia.
Ernestus
Adī et pete.
Eusēbius
Quid? sī nōlit dare.
Ernestus
Immō facillimē.
Eusēbius
Quī scīs istud?
Ernestus
Quia satis est crēdulus nōbīs; nisi quī aliquotiēs illum fefellērunt.
Eusēbius
Numquam sciēns illum fefellī.
Ernestus
Itō igitur fīdenter.
Eusēbius
Nunc eō.
Ernestus
Sed heus prius meditāre, quid sīs dictūrus, nē forte loquendō haereās.
Eusēbius
Bene monēs: nōn accēdam imparātus.

Ēlocūtiō

⟵ Previous Next ⟶