Latine Loquor - Liber Tertius - Colloquium Quārtum
Dēsidērius et Dionȳsius colloquuntur dē mātrimōniō. Adulēscēns doctus et bene mōrātus. Puella bene īnstitūta. Exemplum prosperī coniugiī.
Persōnae:
Dēsidērius, Dionȳsius.
Dēsidērius, Dionȳsius.
Dēsidērius
Euge, audīvī sorōrem tuam nūpsisse.
Dionȳsius
Vērum audīstī.
Dēsidērius
Quis est marītus eius?
Dionȳsius
Quīdam cīvis Lugdūnēnsis, honestīs parentibus progenitus.
Dēsidērius
Estne dīves?
Dionȳsius
Tālis habētur: sed tamen pater meus haec longē plūris facit: prīmum, quod ille sit bene mōrātus adulēscēns: deinde, quod nōn sōlum doctissimus, sed etiam bonārum litterārum amantissimus: dēnique, quod vērus Deī cultor et Chrīstiānae religiōnis summus observātor.
Dēsidērius
Mihi narrās egregiōs adulēscentis titulōs. Ō fēlīcem sorōrem tuam, quae Deī beneficiō tālem virum nacta est!
Dionȳsius
Fēlīcem sānē nōn abs rē dīxerīs: modo bonum illud perpetuō sīc agnōscat, ut semper meminerit ex Deī bonitāte profectum esse, ob idque immortālēs agat eīdem grātiās.
Dēsidērius
Crēdō id eam factūram.
Dionȳsius
Ita spērō quidem, sīc enim ā parentibus semper īnstitūta est in doctrīnā Chrīstiānā. Sed mē iam aliō revocant domestica negōtia. Ergō valē, mī Dēsidērī.
Dēsidērius
Tū quoque bene valē, suāvissime Dionȳsī.
Dionȳsius
Quid vīs?
Dēsidērius
Ut verbīs meīs dīcās salūtem plūrimam tuīs omnibus, praecipuē patrī mātrīque, et ipsī novae nuptae: mēque eī grātulārī faustum illud coniugium.
Dionȳsius
Ego vērō id faciam, et quidem libentissimē.
Ēlocūtiō
- Audīvī sorōrem tuam nūpsisse frātrī meō.
- Mercātor Heidelbergēnsis.
- Progenitus parentibus honestīs ... bonīs parentibus prognātus est.
- Amplā et honestā familiā progenitus, nātus.
- Nōbilī genere nātus est; summō genere nātus, clārīs maiōribus, nōbilissimā familiā.
- Stirpe antīquissimā.
- Obscūrīs nātus parentibus; obscūrīs nātālibus ortus; obscūrō locō nātus, vel ignōbilī.
- Marītus Margarītae habētur vir dīves.
- Ego plūris faciō virtūtem quam nummōs.
- Adulēscēns bene mōrātus.
- Amantissimus bonārum litterārum.
- Narrāre alicui aliquid, dē rē aliquā.
- Ūnusquisque gaudet sē honōrificē appellārī ... sē titulīs ōrnārī egregiīs.
- Ō fēlīcem sorōrem tuam, quae virum tālem nacta est.
- Nancīscī aliquid beneficiō Deī.
- Nōn abs rē frātrem tuum dīxerīs fēlīcem.
- Agnōscō bonum illud ex bonitāte Deī profectum esse.
- Multa ab ipsō in mē beneficia sunt profecta.
- Agō Deō grātiās immortālēs ... agamque, dum vīvam.
- Agās parentibus tuīs meō nōmine dīligenter grātiās.
- Crēdō sorōrem hōc factūram esse.
- Īnstituere aliquem litterīs Graecīs.
- Sīc īnstitūtus est ā praeceptōre ... in doctrīnā Chrīstī.
- Īnfōrmāre, īnstituere aliquem in ingenuīs artibus. Imbuere aliquem bonīs mōribus, doctrīnā, religiōne. Ērudīre aliquem in hīs vel illīs rēbus.
- Negōtia domestica mē aliō iam revocant.
- Dīc omnibus tuīs verbīs meīs salūtem.
- Salūtā omnēs tuōs meō nōmine.
- Dīxī salūtem plūrimam novae nuptae.
- Grātulor sorōrī tuae faustum hōc coniugium.
- Grātulor tibi hanc rem, hāc rē, dē hāc rē ... Grātulor tibi ductam uxōrem.