Latine Loquor - Liber Tertius - Colloquium Vīcēsimum
Benedictus ā Baldō pennam commodātō petit: hic prīmō fingit sē commodāre nōlle: deinde dōnō dat. Chrīstī praeceptum. Chrīstiānus dēbet Chrīstum praeceptōrem imitārī. Colloquendī occāsiō quaesīta per simulātiōnem.
Persōnae:
Benedictus, Baldus.
Benedictus, Baldus.
Benedictus
Habēsne duās aut trēs pennās?
Baldus
Sunt mihi tantum duae.
Benedictus
Dā mihi ūnam commodātō.
Baldus
Nōn faciam.
Benedictus
Cūr nōn?
Baldus
Nē abūtāris.
Benedictus
Meminerīs: fortasse aliquandō mē frūstrā rogābis aliquid.
Baldus
Atquī iubet Chrīstus malum bonō compensandum.
Benedictus
Nōndum istud didicī.
Baldus
Tamen discās oportet, sī cupīs esse Chrīstī discipulus.
Benedictus
Quid cupiō magis?
Baldus
Disce igitur Magistrum imitārī.
Benedictus
Discam prōgressū temporis.
Baldus
Praestat nunc incipere, cum per tempus licet.
Benedictus
Nimis urgēs, nōndum complēvī annum octāvum, ut ait māter.
Baldus
Semper est bene agendī tempus: sed interim nē mihi, quaesō, suscēnseās. Iocābar enim, ut tē ad colloquendum invītārem tantisper, dum sumus ōtiōsī. Ecce tibi penna, eaque nōn omnīnō pessima.
Benedictus
Reddam tibi statim atque aliquid dēscrīpserō.
Baldus
Nōlō mihi reddās.
Benedictus
Quid igitur faciam?
Baldus
Quidquid vīs: ā mē enim tibi dōnō dātur.
Benedictus
Grātiam habeō maximam.
Ēlocūtiō
- Sunt condiscipulō meō tantum trēs pennae.
- Dā mihi pennam commodātō ... nōn abūtar illā.
- Malum bonō compensandum.
- Oportet discās praelēctiōnem, sī cupīs esse discipulus bonus.
- Imitārī magistrum.
- Prōgressū temporis ēvādet vir doctus.
- Nōn licet mihi per tempus.
- Tempus nōn fert, concēdit, permittit, patitur, tempus postulat, dēsīderat.
- Complēvī annum vīcēsimum ... nātus sum annōs octō; explēvī, excessī annum octāvum.
- Semper est bene agendī tempus.
- Nimis urget nōs praeceptor ... ad studia; ad solūtiōnem urgēre.
- Suscēnsēre alicui, īrāscī alicui; nē mihi suscēnsuerīs, sed īnferiōrum classium discipulīs.
- Invītāre aliquem ad colloquendum Latīnē ... ad prandium, cēnam.
- Uterque ōtiōsus est.
- Ecce tibi penna, eaque nōn omnīnō pessima.
- Reddam tibi pennam, cum aliquid dēscrīpserō.
- Fac quidquid vīs.
- Hic imperiālis ā mē tibi dōnō dātur.
- Dō tibi librum dōnō, dōnō tibi hunc librum, dōnō tē hōc librō.