Latine Loquor - Liber Tertius - Colloquium Quārtum Decimum
Quīdam domum profectūrus paulō ante vīndēmiam prōmittit amīcō sē cūrātūrum, ut et ille eōdem arcessātur. Exemplum puerīlis amīcitiae.
Persōnae:
Philippus, Prōtāsius.
Philippus, Prōtāsius.
Philippus
Quandō profectūrus es domum?
Prōtāsius
Crās, Deō iuvante.
Philippus
Quis iussit?
Prōtāsius
Pater.
Philippus
Quōmodō autem iussit?
Prōtāsius
Ad mē scrīpsit superiōre hebdomadā.
Philippus
Quō diē litterās accēpistī?
Prōtāsius
Diē Veneris.
Philippus
Quid continēbant praetereā litterae?
Prōtāsius
Omnēs rēctē valēre, proximīs diēbus initium fore vīndēmiae.
Philippus
Ō fortūnātum, quī vīndēmiātum properās!
Prōtāsius
Vīs dīcam patrī meō, ut tē arcessat?
Philippus
Quam grātum mihi fēcerēs! Sed vereor, ut velit.
Prōtāsius
Immō gaudēbit, cum propter nostram coniūnctiōnem tum vērō quia et Latīnē colloquendō nōs exercēbimus, et dē studiīs ūnā interdum cōnferēmus.
Philippus
Ō, gaudiō tōtus exsiliō. Amābō tē, id cūrā, mī animule.
Prōtāsius
Sentiās: interim Deum precēmur, ut dicta, facta, et cōnsilia nostra vertat in glōriam suī nōminis.
Philippus
Bene monēs, et certē ita expedit facere.
Ēlocūtiō
- Proficīscī domum.
- Quō parās proficīscī? quō parās profectiōnem?
- Crās Deō iuvante iter faciam, cōnferam mē Francofurtum.
- Quis iussit tē abīre?
- Pater ad mē scrīpsit superiōre hebdomadā.
- Diē Veneris accēpī litterās ex patriā, quae summam mihi attulērunt, summam peperērunt voluptātem, māgnā voluptāte mē affēcērunt, mē perfūdērunt.
- Litterae nihil bonī continēbant ... continēbant omnēs rēctē valēre.
- Spērō brevī initium fore vīndēmiae.
- Properāre vīndēmiātum.
- Vīs dīcam patrī meō?
- Arcessere aliquem.
- Facere grātum alicui.
- Vereor, ut velit, i.e. nē nōlit.
- Vereor, nē praeceptor omnia rescīverit.
- Gaudēre aliquā rē.
- Gaudēre in sinū.
- Praeceptor gaudet vehementer, quod exerceātis vōs colloquendō Latīnē.
- Cōnferre dē studiīs ... manūs; cōnferre cum aliquō.
- Cōnferre in aliquid studia, in aliquid operam multam, in aliquem locum sē.
- Exsilīre gaudiō, gestīre laetītiā.
- Precārī Deum cum attentissimā animī dēvōtiōne.
- Vertere dicta et facta sua in Deī glōriam.