Latine Loquor - Liber Secundus - Colloquium Sextum
Liber ēleganter compāctus ostentātur. Reprehenditur stulta quaestiō: excūsātur, quasi iocus fuerit. Iocus inter familiārēs ūsitātus. In iocīs nostrīs Deus nōn est offendendus.
Persōnae:
Ferdinandus, Geōrgius.
Ferdinandus, Geōrgius.
Ferdinandus
Quis iste novus liber deaurātus, quem tam magnificē ostentās?
Geōrgius
Terentius.
Ferdinandus
Ubi impressus?
Geōrgius
Līpsiae.
Ferdinandus
Quis tibi dedit eum?
Geōrgius
Ēmī pecūniā meā.
Ferdinandus
Unde nactus erās pecūniam?
Geōrgius
Stultē istud quaeris; quasi vērō fūrātus sim.
Ferdinandus
Absit ā mē id cōgitāre: sed animī causā id rogābam.
Geōrgius
Nec ego seriō dictum tuum reprehendī: sed eō mōre iocārī solēmus cum familiāribus.
Ferdinandus
Nihil iocārī prohibet, modo nē Deus offendātur. Sed age, ad propositum revertāmur: dē quō ēmistī Terentium istum?
Geōrgius
Dē Clēmente.
Ferdinandus
Illōne bibliopolā circumforāneō?
Geōrgius
Maximē.
Ferdinandus
Quantī cōnstitit?
Geōrgius
Decem nummīs.
Ferdinandus
Nihilne amplius?
Geōrgius
Nihil omnīnō.
Ferdinandus
Profectō satis vīle pretium.
Geōrgius
Praesertim cum aurātus adeōque ēleganter compāctus sit.
Ferdinandus
Erantne cōdicēs aliī similēs?
Geōrgius
Duo vel trēs.
Ferdinandus
Dēdūc mē quaesō ad illum.
Geōrgius
Eāmus.
Ēlocūtiō
- Liber deaurātus.
- Liber iste quidem deaurātus est, sed dēprāvātus.
- Liber mūtilātus est, nōn est integer.
- Hic liber mendōsus est; cōdex ille mendīs scātet; hoc volūmen refertum est mendīs; liber mendōsē impressus est.
- Ostentāre rem aliquam.
- Ostentāre sē; ostentāre patientiam suam.
- Alterā manū fert lapidem, pānem ostentat alterā.
- Ubi impressus est liber tuus? Resp. Francofurtī, Līpsiae, Lutātiae Parīsiōrum.
- Quis dedit tibi Terentium, Vergīlium, Cicerōnem istum?
- Emere pecūniā suā rem aliquam.
- Emere pretiō parvō ... pretiō minōre ... pretiō minimō ... emere pretiō māgnō, maiōre, maximō ... emere minōris.
- Emere cārē, māgnō, cārius, cārissimē; aestimāre māgnī, plūris, plūrimī.
- Emere minimō ... ēmī tribus nummīs, duōbus obolīs.
- Māgnō ēmī librōs.
- Unde nactus est pecūniam? ... Thēsaurum nactus sum.
- Nancīscī occāsiōnem ... hospitium ... potestātem.
- Quaerere ex aliquō ... dē, abs aliquō.
- Quaerō tē.
- Stultē quaerere aliquid ... quod quaesīvistī ex mē stultē, sapienter respondēbō.
- Quaerō tē hanc rem ... quaerō tē dē hāc rē ... quaerō hanc rem abs tē.
- Fūrārī aliquid ... alicuī ...
- Fūrtum facere, subdūcere, subtrahere, sublegāre; pecūnia fūrtīva.
- Animī causā hoc rogābam.
- Reprehendere dictum alicuius ... reprehendere aliquem seriō, gravissimīs verbīs.
- Austērīs verbīs increpāre.
- Reprehendere factum alicuius.
- Iocārī cum aliquō ... nihil iocārī prohibet.
- Offendere aliquem ... offendere ad aliquid ... offendere caput ad parietem.
- Offendere aliquem contumēliā.
- Revertī ad propositum ... revertī ad diem ... revertī in grātiam cum aliquō.
- Redīre in grātiam.
- Thēsaurus verbōrum cōnstitit decem nummīs.
- Plūris cōnstitī patrī meō, quam umquam rependere possum.
- Ēmī pretiō minōre quam tū ... ēmī dimidiō vīlius ... duplō cārius.
- Emere pecūniā praesentī ... Ēmit Vergīlium tantī, quantī bibliopola voluit.
- Quantī licitātus es librum?
- Liber ēleganter compāctus est ā glūtinātōre librōrum.
- Dēdūcere aliquem ad aliquem.
- Dēdūcere domum.