Latine Loquor - Liber Secundus - Colloquium Quīnquāgēsimum Sextum
Nōn sōlum nōbīs nātī sumus: sed alius alium sollicitē cūrāre dēbet in tempore. Exemplum tempestīvae admonitōnis.
Persōnae:
Torquātus, Vincentius.
Torquātus, Vincentius.
Torquātus
Quid cōgitās, Vincentī? Cavē tibi, obsecro.
Vincentius
Quid mihi cavēbō?
Torquātus
Nē in morbum incidās.
Vincentius
Quā ex causā?
Torquātus
Ex nimiā lūsūs intemperantiā.
Vincentius
Unde appāret perīculum?
Torquātus
Quia tōtus aestuās, tōtus sūdōre madēs.
Vincentius
Rēctē et in tempore admonēs: profectō nōn sentiēbam.
Torquātus
Dēsiste, sī mē audīs.
Vincentius
Audiō vērō libenter, ac tibi mōrem gerō: quis enim respuat tam fidēle cōnsilium?
Torquātus
Dēterge faciem sūdāriōlō, et indue tē celeriter: nē subitum frīgus contrahās.
Vincentius
Habeō tibi grātiam: nam ferē morbīs sum obnoxius.
Torquātus
Quid est causae?
Vincentius
Īnfīrmitās meae valētūdinis: vidēs enim, quam imbēcillō sim corpore.
Torquātus
Eō magis dēbēs tibi cavēre.
Vincentius
Istud probē nōvī, et parēns uterque mē monet saepissimē; sed quid agās? Nātūrā prōnī sumus in nostram perniciem.
Torquātus
Ō mī Vincentī, nōn est voluptātī serviendum, sed temperantiā valētūdinī cōnsulendum.
Vincentius
Est in promptū carmen Catōnis in eam sententiam.
Torquātus
Teneō, sed dē hīs aliās: iam satis indūtus es, nōn est, quod hīc morēre diūtius.
Vincentius
Valē, Torquāte, monitor amīcissime.
Torquātus
Vīn' tū domum tē dēdūcam?
Vincentius
Nihil opus est dēdūctiōne: ego bellē mē habeō, Deī beneficiō.
Torquātus
Mī Vincentī, cūrā ut valeās.
Ēlocūtiō
- Cōgitāre dē rē aliquā.
- Cōgitāre etiam atque etiam.
- Cavēre sibi ab aliquō; aliquem.
- Cavēre aliquid ... vitia.
- Cavē, nē hōc faciās ... cavē hōc faciās, cavē fēcerīs.
- Incidere in morbum ... in febrim.
- Madēre sūdōre.
- Dēsistere ā sententiā suā.
- Dēsistere dē sententiā ... sententiā dēsistere; coeptīs.
- Gerere mōrem alicui.
- Respuere fidēle cōnsilium praetōris.
- Dētergere faciem sūdāriōlō.
- Induere sē ... induere pallium ... nōn fuit indūtus palliō.
- Contrahere frīgus subitum.
- Avia mea multīs morbīs est obnoxia.
- Esse corpore imbēcillō.
- Prōnī sumus in perniciem nostram ... prōnus ad īram.
- Servīre alicui ... soror mea servit mercātōrī.
- Cōnsulere valētūdinī suae.
- Pecūnia est in promptū ... habēre praesentem pecūniam.
- Nōndum est indūtus palliō.
- Bellē habēre, bene valēre.