Latine Loquor - Liber Secundus - Colloquium Quīnquāgēsimum Quīntum
Silvērius et Theodōrus parant sē ad lūdendum pilā manuālī.
Persōnae:
Silvērius, Theodōrus.
Silvērius, Theodōrus.
Silvērius
Impetrāstī lūdendī facultātem?
Theodōrus
Impetrāvimus.
Silvērius
Ad quod usque tempus?
Theodōrus
Ad cēnam usque.
Silvērius
Quī dedērunt versūs?
Theodōrus
Prīmī et secundī.
Silvērius
Quid cēterae classēs?
Theodōrus
Prīmus quisque decuriō trium proximārum classium prōnūntiāvit ūnam ē Sacrīs Litterīs sententiam.
Silvērius
Nōnne precātī estis, ut solēmus?
Theodōrus
Precātī et quidem praesente lūdimagistrō: tū vērō ubi erās?
Silvērius
Eram domī ā mātre arcessītus.
Theodōrus
Nunc igitur, quid agere cōgitās?
Silvērius
Lūdere sēsquihōram, deinde ad studium mē recipere.
Theodōrus
Vīn' tū, tibi sim collūsor?
Silvērius
Quidnī velim?
Theodōrus
Quō lūsū nōs exercēbimus?
Silvērius
Nūllus est mihi iūcundior pilā manuālī.
Theodōrus
Nec mihi quidem.
Silvērius
Vīsāmus igitur, an cēterī partēs sortītī sint, nam sī sōlī lūdāmus, minus erit voluptātis.
Theodōrus
Vīsāmus sānē.
Ēlocūtiō
- Impetrāre facultātem lūdendī. Latrūnculīs lūdere; proelia latrōnum lūdere.
- Ad quod usque tempus impetrāstī facultātem lūdendī? Ad vesperam usque.
- Prōnūntiāre sententiam ē Sacrīs Litterīs ... ex catēchēsī.
- Arcessītus sum domum.
- Lūdere sēsquihōram.
- Recipere sē domum ... ad lūsum.
- Vīn', ut tibi sim collūsor?
- Quō lūsū exercēbimus nōs?
- Manubriātī rēticulī lūdus; manubriātō rēticulō ac pilā lūdere.
- Quod lūsūs genus trāctābimus?
- Lūdēmus āleā.
- Lūdēmus cōnīs.
- Contendāmus cursū.
- Nūllus lūsus iūcundior est pilā manuālī.
- Sortīrī partēs.
- Ego et Frīderīcus ab eādem stāmus parte.
- Contrāriās partēs tuentur Arnulphus et Geōrgius.
- Contingit mihi id quod voluī.