Latine Loquor - Liber Secundus - Colloquium Quadrāgēsimum Quīntum

Duō discipulī dē ūsū chartārum pueriliter disputant.

Persōnae:
Gregōrius, Herminius.
Gregōrius
Unde venīs?
Herminius
Forīs.
Gregōrius
Quid prōdierās?
Herminius
Ut emerem chartam.
Gregōrius
Ēmistīne?
Herminius
Ēmī.
Gregōrius
Quantum ēmistī?
Herminius
Scapum.
Gregōrius
Quantī?
Herminius
Quīnque nummīs.
Gregōrius
Cuius fōrmae?
Herminius
Minōris.
Gregōrius
Ostende.
Herminius
Vidē num bona sit.
Gregōrius
Bona est, profectō: in quem ūsum ēmistī?
Herminius
Inepte quaeris: quis est chartārum ūsus nisi ad scrībendum?
Gregōrius
Immō alius.
Herminius
Quis, cēdō?
Gregōrius
Ad mercēs involvendās.
Herminius
Intellegēbam dē chartā scholasticā, nōn dē emporeticā, nōn enim sum mercātor.
Gregōrius
Ūtimur etiam chartā ad siccandam recentem scrīptūram.
Herminius
Satis sciō, sed charta illa est bibula.
Gregōrius
Et tamen charta est.
Herminius
Estō.
Gregōrius
Ergō multiplex est chartae ūsus, etiam in scholā.
Herminius
Cōgor fatērī.
Gregōrius
Etiam dīcam tibi alium ūsum et quidem in scholā frequentissimum.
Herminius
Quem?
Gregōrius
Nōn ausim dīcere sine praefātiōne honōris.
Herminius
Quid opus est inter nōs honōrem praefārī? nōn enim verba foetent.
Gregōrius
Dīcam igitur, quandō ita vīs.
Herminius
Dīc līberē.
Gregōrius
Charta pūrgātōria.
Herminius
Illūc nōn semper feruntur chartae pūrae, sed iam scrīptae, eaeque inūtilēs.
Gregōrius
Quid tum? chartae sunt tamen.
Herminius
At ego dē chartā pūrā et novā loquēbar.
Gregōrius
Sed interim victus es.
Herminius
Sīc ita sānē: nōn mē paenitet disputātiūnculae huius nostrae. Sed iam ā lūsū discēditur.
Gregōrius
Et nōs ergō locō cēdāmus.

Ēlocūtiō

⟵ Previous Next ⟶