Latine Loquor - Liber Secundus - Colloquium Duodēquadrāgēsimum
Pennae vēnālēs. Dīversa vīvendī ratiō prō locōrum dīversitāte. Hīc observā commūnem emptōrum mōrem, quī tot verbīs cōnantur dē pretiō prōpositō aliquid dētrahere.
Persōnae:
Venantius, Arnoldus.
Venantius, Arnoldus.
Venantius
Pennae istae, quās circumfers, suntne vēnālēs?
Arnoldus
Etiam, sī sē emptor obtulerit.
Venantius
Ostende; vah! quam sunt mollēs.
Arnoldus
Tentā dīligenter, sunt enim aliae aliīs firmiōrēs.
Venantius
Satis videō quālēs sint, quot vīs dare prō nummō?
Arnoldus
Tantum sex.
Venantius
Quid ais? Sex mallem emere ā mercātōribus, quī Lutētiā et Lugdūnō hūc afferunt.
Arnoldus
Quasi nesciam quantī veneant. Audīvī ex frātre, quī dat operam scrībae huius urbis, sē ēmisse Lutētiae quattuor obolō.
Venantius
Aliter Lutētiae, aliter Genavae vīvitur: sed nōn opus est tot verbīs; vīs dare duodecim?
Arnoldus
Huī! duodecim? Quasi ego fūrātus sim.
Venantius
Istud nōn dīcō: sed vidē, an tibi placeat condiciō.
Arnoldus
Vīs ūnō verbō dīcam?
Venantius
Dīc quaesō: satis iam garrītum est.
Arnoldus
Dabō tibi novem, modo prōmiscuē dē meā manū accipiās.
Venantius
Nūgās agis, ego sine dēlēctū nōllem accipere quīndecim. Valē, alibī inveniam satis.
Arnoldus
Per mē licet: heus, heus, redī.
Venantius
Cūr mē revocās?
Arnoldus
Accipe, sī vīs, octō, nec ā mē plūrēs exspectēs.
Venantius
Cēdō tōtum fasciculum, ut dēligam arbitrātū meō.
Arnoldus
Tene, dēlige, ut vīs.
Venantius
Vidē nunc et sī libet, numerā.
Arnoldus
Sunt vīgintī quattuor: cōnstat numerus.
Venantius
Accipe pretium.
Arnoldus
Bene vertat Deus utrīque nostrum.
Venantius
Īdem tēcum optō, atque precor. Sed quandō afferēs meliōrēs pennās?
Arnoldus
Nesciō an meliōrēs possim, sed, ut spērō, brevī plūrēs afferam, cum ad nōs domum proficīscar.
Venantius
Nōn licet mihi diūtius hīc morārī. Valē, Arnolde.
Arnoldus
Cūrā, ut valeās, Venantī.
Ēlocūtiō
- Pennae hae vēnālēs sunt.
- Circumferre pennās vēnālēs.
- Aestimat fasciculum pennārum decem nummīs.
- Emptor sē nōndum obtulit.
- Offere sē ... offerre alicui aliquid ... auxilium, operam, spem ... mūnera alicui.
- Ēmī dīmidiō cārius, quam ēmērunt cēterī.
- Pennae mollēs.
- Penna caule amplō; penna cuspide tenuī ... cuspide dūriusculā ... caule nitidō et firmō.
- Penna ūna firmior alterā.
- Tentāre pennam.
- Quot pennās dabis mihi prō obolō? Trēs, octō, trīgintā.
- Emere scalpellum, gladiolum scriptōrium ā mercātōribus.
- Afferre Lutētiā, Rōmā, Lugdūnō Batāvōrum.
- Quasi nesciat Christophorus, frāter tuus, quantī veneat cornū ātrāmentārium.
- Dare operam alicui ... dare operam mercātōrī.
- Dare operam alicui reī ... mūsicae.
- Dare operam Platōnī.
- Haec thēca pennāria, calāmāria empta est Bernae, Lutētiae paucīs nummīs.
- Aliter vīvitur Lutētiae, aliter Genavae.
- Nōn opus est tot verbīs, ubi rērum testimōnia adsunt.
- Quasi vērō fūrātus sim calamōs.
- An mē fūrātum esse putās?
- Putāsne mē digitīs aduncīs ēmisse?
- Vīs dīcam ūnō verbō?
- Accipere pennās prōmiscuē dē manū mercātōris.
- Agere nūgās.
- Accipere sine dēlēctū.
- Per mē licet.
- Revocāre aliquem.
- Accipe, sī vīs octō, nec ā mē plūrēs exspectā.
- Cēdō tōtum fasciculum.
- Dēligere arbitrātū suō.
- Dēlige ut vīs.
- Numerā pennās, sī libet.
- Cōnstat numerus ... accipere pretium.
- Proficīscī domum ... in patriam; Carthāginem, Venetiās.
- Nōn licet mihi hīc diūtius morārī.
- Cūrā, ut valeās.
- Dā operam, ut valeās.
- Valētūdinem tuam cūrā dīligenter.