Latine Loquor - Liber Secundus - Colloquium Vīcēsimum Sextum
Gregōrius Hugōnem ad repetendam praelēctiōnem invītat. Exemplum dīligentiae in studiō.
Persōnae:
Gregōrius, Hugō.
Gregōrius, Hugō.
Gregōrius
Fēcistīne officium tuum?
Hugō
Quā in rē?
Gregōrius
In repetendā praelēctiōne.
Hugō
Nihil adhūc repetīvī.
Gregōrius
Quid causae fuit?
Hugō
Exspectābam, dum redīret compar meus.
Gregōrius
Quō ille iit?
Hugō
Domum.
Gregōrius
Quid eō?
Hugō
Petītum merendam.
Gregōrius
Quid sī redībit sērius?
Hugō
Nesciō: fierī potest.
Gregōrius
Vīs intereā mēcum repetere.
Hugō
Equidem nōn recūsō.
Gregōrius
Sēcēdāmus igitur, nē quis molestus sit nōbīs.
Hugō
Profectō bene monēs: nēmō studēre potest in tantō ambulātōrum strepitū et clāmōre.
Gregōrius
Aspice illīc locum remōtissimum, ubi nūllī sunt ambulantēs.
Hugō
Eāmus illūc.
Ēlocūtiō
- Facere officium.
- Facere officium in rē aliquā.
- Quid causae est, quod frāter tuus nōndum repetat praelēctiōnem?
- Exspectāre aliquem. Exspectō, dum redeat compar meus.
- Īre domum ... rūs.
- Ībō petītum, petītūrus, ad petendam, petendae merendae grātiā, ut petam merendam.
- Fierī potest, ut professōrēs redeant sērius.
- Ego tēcum repetam.
- Recūsāre, abnuere, renuere, negāre, dēnegāre.
- Nihil tibi ā mē postulantī recūsābō.
- Recūsat hoc facere, negat sē hoc factūrum.
- Sēcēdere dē viā ... sēcēdere in locum aliquem.
- Molestus es mihi.
- Ronchus tuus mihi molestus est.
- Quis intus hīc est strepitus? quāle murmur?
- Quis tantum excitat strepitum et clāmōrem?
- Sēcēdāmus in locum remōtissimum.
- Locus ab omnium hominum cōnsortiō remōtus.
- Eāmus illūc, ubi nūllī sunt ambulantēs.