Latine Loquor - Liber Secundus - Colloquium Vīcēsimum Quīntum
Ferdinandus cōnferre studet dē ōrātiōne sacrā: Geōrgius recūsat atque offenditur. Exemplum in mōrum dissimilitūdine.
Persōnae:
Ferdinandus, Geōrgius.
Ferdinandus, Geōrgius.
Ferdinandus
Hodiē tē nōn vīdī in ōrātiōne sacrā: quid hoc sibi vult?
Geōrgius
Quid sibi velit nesciō: ego tamen interfuī.
Ferdinandus
Narrā mihi, quae mandāstī memoriae.
Geōrgius
Nōn est tuum ā mē ratiōnem exigere.
Ferdinandus
Ego quidem nōn exigō: vērum id rogō, ut memoriae causā cōnferāmus ūnā.
Geōrgius
Malim nunc sōlus recordārī. Audiēs mē, sī vīs, cum praeceptor ante prandium nōs interrogābit.
Ferdinandus
Quid malī erit, sī nunc inter nōs eā dē rē cōnferāmus?
Geōrgius
Nihil malī erit, fateor: sed nōn mihi libet.
Ferdinandus
Tua igitur tē libīdō regit.
Geōrgius
Ōmitte mē: cūr molestus es?
Ferdinandus
Ōmittō sānē, sed audī ūnum verbum. Nōn decet condiscipulum esse tam morōsum.
Geōrgius
Nec condiscipulum decet esse tam molestum.
Ēlocūtiō
- Quid hoc sibi vult?
- Vīdī ipsum in forō stantem, cum habērētur cōntiō.
- Rogā, an Paulus interfuerit cōntiōnī.
- Mandāre aliquid memoriae in cōntiōne ... observāre aliquid ex cōntiōne.
- Committere aliquid memoriae, commendāre, custōdīre aliquid memoriā.
- Numquam ex animō meō discēdat hodierna cōntiō.
- Exigere ratiōnem.
- Cūr rogās id? Ut cōnferāmus ūnā memoriae causā.
- Cōnferre novissima prīmīs; cōnferre manūs; cōnferre sē in fugam; cōnferre beneficia in aliquem; cōnferre ratiōnēs.
- Omnem operam cōnferre ad philosophiam.
- Recordārī, reminīscī, meminisse, in memoriam revocāre, memoriā repetere, redigere in memoriam.
- Interrogāre aliquem.
- Nihil malī est.
- Cōnferre inter sē dē rē aliquā.
- Nōn libet mihi hoc facere.
- Regī libīdine suā.
- Regere rem pūblicam.
- Regere aliquem disciplīnā.
- Ōmittere aliquem ... ; molestus es mihi ... ; muscae mihi admodum sunt molestae.
- Audī ūnum verbum; nōn decuit tē esse adeō morōsum; nec tē decēbit in posterum esse tam molestum patrī meō.