Latine Loquor - Liber Secundus - Colloquium Vīcēsimum Prīmum
Vehementer dolet Bernardus sē ā suōrum studiōrum sociō Christophorō dēserī, adeō ut nē amīcīs quidem et salūtāribus admonitiōnibus lēniātur dolor. Locōrum intervallum nōn semper dīrimit amīcitiās.
Persōnae:
Bernardus, Christophorus.
Bernardus, Christophorus.
Bernardus
Ergone abīs in patriam?
Christophorus
Cogor, abīre, nempe arcessītus ā patre.
Bernardus
Numquamne es reversūrus?
Christophorus
Nōn spērō.
Bernardus
Quandō profectūrus es?
Christophorus
Crāstinō diē, ut opīnor.
Bernardus
Sīccine igitur mē relinquis?
Christophorus
Ita necesse est.
Bernardus
Ō mē miserum! Ubi et quandō amīcum tālem reperiam? Tālem studiōrum meōrum socium?
Christophorus
Nē doleās; estō animō bonō: meliōrem dabit tibi Deus.
Bernardus
Ille quidem potest, sciō: at ego vix spērāre possum.
Christophorus
Nōlī, obsecro, tē afflīgere tantopere. Nec enim hāc sēparātiōne corporum interitūra est amīcitia nostra: quīn potius accrēscet magis, et absentēs corpore praesentēs animīs erimus. Quid epistulae, quās ultrō citrōque dabimus, quantam vim spērās habitūrās esse? Quid quod mūtuō illō dēsīderiō amor ipse noster fiet iūcundior?
Bernardus
Vērīsimilia sunt, quae dīcis, omnia: sed interim nōn lēnitur dolor meus.
Christophorus
Ah! reprime lacrimās.
Bernardus
Nōn queō prae dolōre.
Christophorus
Sīccine agis? An putās mē minōre dolōre tangī? Sed quid agis? Dīvīnae voluntātī parendum est. Nunc ipse tē collige, obsecro, ac potius ad hilariter cēnandum tē parā. Plūribus post cēnam colloquēmur.
Bernardus
Ō quam trīste dīvortium!
Ēlocūtiō
- Abīre in patriam.
- Quia cogor abīre in patriam, sine mē abīre ... sine (ut) abeam, mitte mē, ōmitte mē.
- Pater arcessīvit frātrem meum domum.
- Sī erit necesse, arcesse mē: Sī quid erit opus, arcesse mē hinc.
- Suō iūmentō sibi malum arcessit.
- Spērō mē brevī reversūrum.
- Revertit eques ... revertit pedibus vel pedēs ... viā ferreā, birōtā automātāriā, autocīnētō.
- Crāstinō diē, ut opīnor, Geōrgius profīcīscētur Rōmam ... Venetiās.
- Profīcīscī ad locum ... dē locō ... obviam alicuī.
- Omnia ab illō profīcīscuntur mala.
- Necesse est, ut relinquam tē.
- Relinquere aliquem ... relinquere aes aliēnum grande.
- Relinquere inultum.
- Relinquere testāmentō alicuī aliquid.
- Socius studiōrum ... socius itinerum.
- Dolēre ... in dolōre vel in maerōre esse ... maerēre.
- Hoc mihi dolōrī est.
- Dīcam illī quod doleat.
- Doleō vicem illīus.
- Esse bonō animō ... animum capere, sūmere, recipere.
- Socius melior.
- Spērō, spem habeō, spē dūcor, habet mē spēs, spēs est.
- Nūlla spēs est fore, futūrum esse.
- Bona spēs habet animum meum.
- Vix spērō (spē teneor) hoc futūrum.
- Afflīgere sē, sēsē.
- Īnfandīs malīs afflīgimur.
- Afflīgere sententiīs aliquem.
- Afflīgī morbō.
- Fidēs afflīcta.
- Afflīgī acerbē dē rē aliquā.
- Amīcitia vēra nōn interit sēparātiōne corporum.
- Absentēs corpore, praesentēs sunt animīs.
- Ultrō citrōque ... hūc, illūc ...; sūrsum, deorsum.
- Dare litterās ultrō citrōque.
- Ultrō citrōque cursitat.
- Multīs verbīs ultrō citrōque habitīs.
- Ille nōbīs cōnsūmptus est diēs.
- Litterae tuae māgnam vim, māgnum pondus, habent.
- Mūtuum dēsīderium.
- Amor meus factus est iūcundior, dēsīderiō mūtuō.
- Amor tuus, quō tū amās ... amor tuī, quō tū amāris.
- Id quod tū dīcis (narrās), nōn vidētur mihi vērīsimile.
- Lēnīre dolōrem ... īram ... aegrītūdinem.
- Reprimere lacrimās.
- Lacrimās cohibēre (reprimere) nequeō, nōn possum tenēre lacrimās.
- Lacrimae ipsī prōsiluērunt, obortae sunt ipsī lacrimae.
- Nōn queō prae dolōre tenēre, mittere, sistere, cohibēre, reprimere lacrimās ... abstinēre, temperāre ā lacrimīs.
- Nōn minōre tangor dolōre.
- Tangī dolōre.
- Hoc mē tangit ... ōrdō tē tangit ... tangere manū.
- Parēre voluntātī dīvīnae.
- Oboediam et parēbō voluntātī tuae.
- Quidquid iusseris, faciam.
- Ad nūtum tibi parātus erō.
- Mē tōtum ad nūtum et voluntātem tuam convertam.
- Colligere sē ...; colligere stipem.
- Parāre sē ad aliquid ... ad prandium, cēnam; cēnandum, ientandum.
- Ā cēnā plūribus tēcum colloquar.
- Dīvortium facere.
- Facere dīvortium doctrīnārum.