Latine Loquor - Liber Secundus - Colloquium Duodēvīcēsimum
Scrīptūrus quīdam dētractat praelēctiōnem repetere. Lūdō temporis quid dētrahendum, idque studiīs impendendum. Exemplum puerī lūsibus dēditī.
Persōnae:
Theodorīcus, Vincentius.
Theodorīcus, Vincentius.
Theodorīcus
Vincentī.
Vincentius
Quid vīs?
Theodorīcus
Repetāmus ūnā praelēctiōnem.
Vincentius
Nōn est mihi ōtium.
Theodorīcus
Quid habēs negōtiī?
Vincentius
Volō scrībere.
Theodorīcus
Quid scrībere parās?
Vincentius
Dictāta praeceptōris.
Theodorīcus
Cūr herī nōn scrīpsistī?
Vincentius
Quō tempore scrīberem?
Theodorīcus
Cum lūdēbātur.
Vincentius
At ego nōlēbam āmittere lūdendī occāsiōnem.
Theodorīcus
Ah piger, nihil aliud quam lūsiōnēs meditāris. Nōnne diēbus Mercuriī et Saturnī ternae sunt hōrae līberae?
Vincentius
Līberae quidem sunt, sed ad lūsum dēstinātae, dēputātae, assignātae.
Theodorīcus
Immō partim lūsibus aut alicuī honestae remissiōnī, partim studiō litterāriō sunt dicātae.
Vincentius
Fateor dumtaxat iīs, quī volunt immorī studiīs.
Theodorīcus
Nōn poterās herī sesquihōram dētrahere lūdō tuō: aut saltem hōram ūnam?
Vincentius
Tū studē quantum vīs: ego vērō lūdam quamdiū licēbit.
Theodorīcus
Per mē quidem licēbit, sed interim parum proficiēs in litterīs.
Vincentius
Nōnne praeceptōrī satisfaciō?
Theodorīcus
Utcumque.
Vincentius
Tū igitur, studiōse, vīs esse praeceptōre ipsō sēvērior? Ōmitte mē tandem, age tuum negōtium, ego meum.
Theodorīcus
Age, age, ut libet.
Ēlocūtiō
- Repetere lēctiōnem ... repetere cōnsuētūdinem ... repetere iūs suum.
- Repetere memoriā aliquid.
- Nōn est mihi ōtium.
- Habēre aliquid negōtiī.
- Parāre sē ad aliquid ... parāre sibi amīcōs ... parāre sibi amīcōs pecūniā.
- Parāre sibi amīcōs mūneribus ...
- Parāre abitum ... parō hoc facere ... parātus ad aliquid.
- Parātus ad omnem ēventum.
- Scrībere dictāta praeceptōris.
- Āmittere occāsiōnem lūdendī ... āmittere aliquid ex animō.
- Āmittere fidem ... excidere fide mercātōrum.
- Āmittere tempus, vīrēs.
- Nīl nisi lūsiōnēs meditāris.
- Haec multō ante meditāre.
- Meditārī fugam ... meditārī abitum ... meditātur rēgnāre.
- Meditārī adversus aliquem aliquid, dē aliquā rē.
- Hōrae līberae ... cōgitātiōnēs sunt līberae.
- Cōgitātiōnum poenam nēmō patitur.
- Dēstinātus ad lūsum ... mortī dēstinātus.
- Dēputāre aliquid in lucrō ... dēputāre sē indignum.
- Attribuere alicuī aliquid ... attribuere culpam alicuī.
- Attribuere locum alicuī ... mihi nātūra attribuit.
- Assīgnāre culpam fortūnae ... assīgnāre locum alicuī.
- Assīgnāre tempus alicuī.
- Dicāre alicuī operam suam ... dicāre Deō aliquid.
- Immorī studiīs, i.e. facere nūllum studiōrum fīnem.
- Dētrahere alicuī aliquid ... dētrahere in iūdicium aliquem.
- Dētrahere vestēs alicuī.
- Tū studē, quantum vīs, ego lūdam, quamdiū licēbit.
- Per mē licet.
- Parum proficere in litterīs ... prōmovēre studia alicuius.
- Nihil proficis.
- Satisfacere alicuī ... satisfacere prōmissīs ... stāre prōmissīs.
- Nēmō illō sēvērior.
- Satisfacere opīniōnī omnium ... satisfacere exspectātiōnī alicuius.
- Ōmitte mē ... fac mē missum.
- Age tuum negōtium, ego meum.
- Tū tuum age, atque estō dīligēns.