Latine Loquor - Liber Secundus - Colloquium Quārtum Decimum
Amīcī lībera reprehēnsiō sī bene accipiātur, haud mediocriter prōdest.
Persōnae:
Robertus, Patricius.
Robertus, Patricius.
Robertus
Unde nunc redīs?
Patricius
Forīs.
Robertus
Cūr prōdīstī?
Patricius
Ut īrem domum.
Robertus
Quid eō?
Patricius
Petītum librōs meōs.
Robertus
Ehō, cūr nōn attulīstī?
Patricius
Oblītus eram.
Robertus
Sīccine solēs ientāculum aut merendam oblīvīscī?
Patricius
Rārissimē.
Robertus
Profectō, māgna fuit neglegentia.
Patricius
Immō maxima: sed quid agās? scholasticī sumus.
Robertus
Quid sī praeceptor tuum factum scīret?
Patricius
Fortasse poenās darem.
Robertus
Aīn tū, fortasse? procul dubiō vapulārēs. Nōn tē pudet sine librīs in scholam venīre?
Patricius
Nōn sōlum pudet, sed etiam piget: vērumtamen nē mē accūsēs obsecro.
Robertus
Nihil minus cōgitō: sed nōn possum dissimulāre, quīn ego tē reprehendam.
Patricius
Istud, crēdō equidem, amīcē facis: itaque bonī cōnsulō.
Robertus
Id satis est mihi. Eāmus intrō in auditōrium.
Patricius
Tempus est.
Ēlocūtiō
- Redeō forīs ... redīre ē forō vel ā forō.
- Redīre domō.
- Iit domum petītum librōs suōs ... petītūrus librōs, ad petendōs librōs.
- Librōs oblīvīscuntur discipulī saepe, ientāculum et merendam perrarō.
- Admodum oblīviōsus est ... satis videō tē meī oblītum esse.
- Māgna, immō maxima fuit neglegentia.
- Dare poenās ... vapulāvit propter neglegentiam ā praeceptōre.
- Paulum aberat, quīn vapulārem.
- Nihil propius fuit, quam ut vapulārem, verberārer.
- Meritō poenās dedit ... dare poenās tergō.
- Huius peccātī poenās dabis acerbissimās.
- Nōn tē pudet pigrītiae ... nōn tē pudet sine librīs venīre in scholam?
- Accūsāre aliquem fūrtī.
- Dissimulāre rem aliquam ... dissimulāre silentiō iniūriam acceptam.
- Dissimulāre odium.
- Reprehendere aliquem.
- Bonī cōnsulere ... cōnsulere aequī bonīque.
- Amīcē facis, quod cōnsulis fāmae, exīstimātiōnī, dignitātī eius.
- Aequī bonīque faciō.
- Tempus est, ut eāmus in auditōrium ... est tempus eundī.
- Praeceptōrēs exigunt ratiōnem scrīptūrae.
- Exigere vectīgal ... poenam ab aliquō.
- Exāctae aetātis vir ... acerbissima exāctiō.