Latine Loquor - Liber Secundus - Colloquium Tertium Decimum
Brevis cōnfābulātiō, sed doctrīnā plēna. Vir bonus et prūdēns occāsiōnem docendī capit ē rē minimā.
Persōnae:
Norbertus, Ottō.
Norbertus, Ottō.
Norbertus
Unde veniēbās modo?
Ottō
Ē culīnā.
Norbertus
Quid illūc ierās?
Ottō
Ut mē calefacerem.
Norbertus
Tū, crēdō, libentius es in culīnā, quam in scholā, nōnne?
Ottō
Nihil mīrum: in scholā nōn est ignis, sīcut in culīnā.
Norbertus
Abī, sī sapīs.
Ottō
Utinam tam saperem in dīvīnīs rēbus, quam in cūrā corporis!
Norbertus
Fac sapiās.
Ottō
Quōmodō?
Norbertus
Studiō, cūrā, labōre, dīligentiā.
Ottō
Nōn parcō labōrī.
Norbertus
Rēctē facis: sed est tempus exspectandum, cuius prōgressū fiunt omnia: intereā precandus est Deus assiduē.
Ottō
Bene monēs: utinam ille studia nostra prōmoveat in glōriam suī nōminis.
Norbertus
Id faciet, sī pergāmus eum colere dīligenter.
Ēlocūtiō
- Vēnit ē culīnā ... vēnit currēns ... vēnit equō, nāvī, nāvigiō, pede, pedēs, autocīnētō, birōtā vēlōcissimā, automātāriā, aeronāvī.
- Venīre sērō ... venīre sērius, post diem festum.
- Calefacere sē ... calefacere aliquem.
- Tū libentius es in culīnā et forō, quam in templō et scholā.
- Utinam hominēs tam saperent in rēbus dīvīnīs, quam cūrā corporis.
- Sapere studiō ... sapere rem suam rēctē ... sapere nihil.
- Parcere labōrī ... parcere alicuī ... parcere nūllī ... parcere auribus alicuius.
- Parcere impēnsīs ... parcite castīs auribus.
- Exspectāre aliquem ... tempus exspectandum est.
- Prōgressū temporis.
- Precārī Deum assiduē.
- Prōmovēre aliquem ... nihil prōmovēs.
- Ō benigne Iēsū, precor Tē ex animō, prōmovē studia mea incepta in nōminis tuī glōriam.
- Pergere colere aliquem ... pergere aliquō ... pergere in maledīcta.
- Colere Deum ... parentēs colendī sunt.