Latine Loquor - Liber Secundus - Colloquium Decimum
Lūdovīcus et Maximiliānus suōs sibi mūtuō librōs enumerant. Legendī interdum librī extrāōrdināriī: praestat sērō quam numquam dīscere.
Persōnae:
Lūdovīcus, Maximiliānus.
Lūdovīcus, Maximiliānus.
Lūdovīcus
Habēsne multōs librōs?
Maximiliānus
Nōn admodum.
Lūdovīcus
Sed quōs habēs?
Maximiliānus
Rudimenta grammaticae, colloquia scholastica, Terentium, Vergīlium, Horātium, epistulās Cicerōnis cum vernāculā interpretātiōne, Catōnem, Lexicon, Testāmentum Novum et catēchēseōs librum, praetereā librum chartāceum ad scrībendum dictāta praeceptōris. Tū vērō quōs habēs?
Lūdovīcus
Omnēs habeō, quōs enumerāstī, praeter Catōnem, Terentium et Cicerōnis epistulās. Cūr enim librōs habeam, quī nōn praeleguntur in scholā nostrā.
Maximiliānus
At ego, dum sumus ōtiōsī, legō interdum illōs: ut semper aliquid addiscam novī, praesertim in linguā latīnā, et honestātis mōribus.
Lūdovīcus
Prūdenter facis, mī Maximiliāne. Ō, mē miserum! quī numquam didicī quid sit studiōsum esse!
Maximiliānus
Disce igitur. Praestat enim sērō, quam numquam dīscere.
Ēlocūtiō
- Habēre multōs librōs ... multam pecūniam ... multum pecūniae.
- Habēre accessum ad aliquem ... habēre amīcum aliquem ... habēre aes aliēnum.
- Habēre colloquium cum aliquō.
- Plānē, quid sit, nōn intellegō, addēs igitur interpretātiōnem vernāculam.
- Scrībam dictāta praeceptōris in librum meum chartāceum.
- Quae memoriā retinēre nequeō, chartīs mandō.
- Omnēs habeō librōs, quōs enumerāstī, praeter Horātium.
- Librī impietātis levitātisque damnātī, nōn praelegendī, sed eōrum lēctiō ceu pestilentia fugienda.
- Praelegere alicuī aliquid.
- Tacitus et Horātius in lūdō hoc annō nōn praeleguntur, explānantur.
- Verbīs ac sermōne Terentium et Cicerōnem effingere studēbō.
- Ōtiōsī sumus ... ōtiāmur ... ōtiō indulgēmus ... vacāmus ōtiō.
- Ōtiōsus ... nihil agēns ... vacuus ab opere ... solūtus omnī opere.
- Quotiēs legō caput ex Sacrīs Litterīs, addiscō aliquid novī.
- Quid novī affers?
- Propter hiemis māgnitūdinem istinc nihil novī ad nōs allātum est.
- Dīscere mōrēs honestātis ... mōrēs honestōs.
- Ā pueritīā mōribus honestātis studuit.
- Frāter tuus facit prōgressum, prōficit, in litterīs et mōribus.
- Litterārum studiōsus.
- Praestat dīscere sērō, quam numquam.