Latine Loquor - Liber Prīmus - Colloquium Vīcēsimum Quīntum
Parvulus puer lūdendī cōpiam sibi et condiscipulīs impetrat.
Persōnae:
Obertus, Paedagōgus.
Obertus, Paedagōgus.
Obertus
Praeceptor, licetne pauca?
Paedagōgus
Loquere audācter!
Obertus
Ego et condiscipulī meī hoc ferē tōtō trīduō librīs affīxī fuimus, licetne paulisper animum lūdō relaxāre?
Paedagōgus
Dīc igitur aliquam sententiam.
Obertus
« Interpōne tuīs interdum gaudia cūrīs:
Ut possīs animō quemvīs sufferre labōrem »
.
Ut possīs animō quemvīs sufferre labōrem »
Paedagōgus
Quam rēctē dīxistī omnia!
Obertus
Est Deī grātia.
Paedagōgus
Addendum posthāc erit aliquid.
Obertus
Praeceptor, quidnam?
Paedagōgus
Quī dedit mihi ingenium et mentem bonam.
Obertus
Sed quis docēbit mē illa verba?
Paedagōgus
Ea scrībam tibi in commentāriōlō tuō, ut ēdīscās. Sed dīc mihi, quaesō, quis tē docuit istam ōrātiōnem, quam prōnūntiāstī?
Obertus
Campānus herī dederat mihi scrīptam: et ego memoriae mandāvī.
Paedagōgus
Profectō ego tē amō, mī Oberte, ob istam dīligentiam.
Obertus
Agō tibi grātiās, praeceptor. Permittisne igitur, ut lūdāmus?
Paedagōgus
Sānē, abī, renūntiā condiscipulīs tuīs.
Obertus
Faciam.
Paedagōgus
Quid dīcis illīs?
Obertus
Id quod mē docuistī aliquandō.
Paedagōgus
Sed volō prius ex tē audīre.
Obertus
Gaudēte puerī: en afferō vōbīs iūcundum nūntium. Ego vōbīs impetrāvī lūdendī potestātem.
Paedagōgus
Euge, probē meministī, ītō nunc iam.
Ēlocūtiō
- Loquī audācter ... cautē ... incondītē ... submissē ... submissā vōce.
- Tōtō ferē hōc trīduō affīxus fuī librīs.
- Affīxus est librīs ... studiō continuō ... nūllum facit studiōrum suōrum fīnem ... nūllam studiīs suīs interpōnit moram.
- Tōtō diē studuī ... studuī per tōtum diem.
- Relaxāre animum lūdō.
- Dīcere sententiam aliquam.
- Sententia mihi dīcenda est.
- Interpōnere gaudia cūrīs.
- Sufferre labōrem nequeō ... nōn sum huic labōrī ferendō.
- Tenēre memoriā.
- Rēctē dicta sunt abs tē omnia.
- Addere alicui aliquid.
- Lānius mātrī meae addidit aliquid mantissae locō.
- Deus dedit frātrī meō bonum ingenium.
- Scrībere in librō aliquid ... in librum.
- Observātor scrīpsit garriēntium nōmina in tabulā.
- Ēdīscere praelēctiōnem ... mandāre memoriae.
- Prōnūntiāre ōrātiōnem.
- Dabō tibi exercitia scrīpta.
- Dedit mihi exercitia dēscrībenda.
- Amō tē ob dīligentiam istam ... dē istā dīligentiā.
- Praeceptor nōn permittet, ut lūdāmus.
- Renūntiāre alicui aliquid ... renūntiā mihi quid pelliō dīxerit.
- Docēre aliquem aliquid ... Quis docuit tē arithmēticam?
- Audīvī ex patre, ex mātre ... ā patre ... dē mātre.
- Gaudēte, quod impetrāvī vōbīs potestātem lūdendī.
- Gaudēte mē impetrāsse ...
- Audiō frātrem tuum valdē gāvīsum esse, cum audīvisset mē vōbīs impetrāsse veniam.
- Spērō omnēs discipulōs gāvīsūrōs esse, cum attūlerō ipsīs iūcundum nūntium.
- Omnēs discipulī gaudēbunt, cum audīverint praeceptōrem dedisse ipsīs veniam.
- Crēdō Philippum gāvīsūrum esse valdē, cum tē salvum vīderit.