Latine Loquor - Liber Prīmus - Colloquium Vīcēsimum Quārtum
Discipulī, quī in cotīdiānō sermōne ad latīnē loquendum dīligenter exercentur, multa dīscunt sine rēgulīs grammaticīs. Bene precandum omnibus, maximē nostrīs.
Persōnae:
Praeceptor, Nicomāchus.
Praeceptor, Nicomāchus.
Praeceptor
Dīc latīnē: ein Buch.
Nicomāchus
Liber.
Praeceptor
Liber cuius generis?
Nicomāchus
Masculīnī.
Praeceptor
Quī scīs?
Nicomāchus
Ex bene loquendī ūsū et cōnsuētūdine.
Praeceptor
Ostende ūsum.
Nicomāchus
Nam cotīdiē loquentēs, sīc dīcimus: hic liber cuius est? Dīcimus item saepe numerō: liber meus, liber tuus, bonus liber et similia.
Praeceptor
Bene respondistī: sed quis loquendī ūsum tē docuit?
Nicomāchus
Tū ipse, praeceptor.
Praeceptor
Ergone tenēs omnem ūsum linguae latīnae?
Nicomāchus
Sī tenērem, iam nōn essem discipulus.
Praeceptor
Quid igitur?
Nicomāchus
Magister, fortasse.
Praeceptor
Abī, respōnsō tuō contentus sum.
Nicomāchus
Gaudeō sānē.
Praeceptor
Age grātiās Deō, quī tibi dedit ingenium et mentem bonam.
Nicomāchus
Utinam semper agnōscam eius in mē beneficia.
Praeceptor
Utinam ille favōre suō tua studia prōsequātur. Nicomāche, quid hoc sibi vult?
Nicomāchus
Quod mihi bene precāris.
Praeceptor
Ergō tū quoque mementō bene ex animō precārī omnibus, praecipuē vērō condiscipulīs tuīs.
Nicomāchus
Meminerō, praeceptor.
Praeceptor
Addendum fuit, Deō iuvante.
Nicomāchus
Oblītus sum, fateor.
Ēlocūtiō
- Dīc latīnē, dā latīnē.
- Hoc sciō ex ūsū et cōnsuētūdine.
- Cuius est hic liber? Petrī.
- Ad quem spectat hic liber? Ad Geōrgium; hic liber cuius est? meus, tuus, ipsius, Paulī.
- Ūsus loquendī ita fert.
- Sī omnia tenērem, nōn essem discipulus.
- Contentus rē aliquā.
- Nēmō suā sorte contentus.
- Gaudeō sānē Deum tibi dedisse mentem bonam.
- Gaudeō frātrem tuum habēre bonum iūdicium ... quod praeditus sit, valeat ingeniō.
- Agnōscere beneficia alicuius.
- Agnōscō beneficia prīncipis in mē collāta.
- Prōsequī aliquem favōre ... amōre.
- Utinam Deus studia nostra suō favōre prōsequātur.
- Quid hoc sibi vult, Andreā?
- Precārī alicui bene ... precārī alicui male.
- Omnibus bene precārī ex animō ... praecipuē condiscipulīs.
- Deō iuvante huius reī semper memor erō.