Latine Loquor - Liber Prīmus - Colloquium Vīcēsimum
Discipulī extrā ōrdinem lūdendī veniam petunt.
Persōnae:
Faber puer, Praeceptor, Guillelmus et Henrīcus.
Faber puer, Praeceptor, Guillelmus et Henrīcus.
Faber
Salvē, praeceptor.
Praeceptor
Sit vōbīs salūs. Iamne repetīvistis?
Faber
Etiam, praeceptor.
Praeceptor
Quis docuit vōs?
Faber
Alter ā praefectō.
Praeceptor
Quid nunc vultis?
Guillelmus
Ut per tē liceat nōbīs parumper lūdere.
Praeceptor
Nōn est lūdendī tempus.
Henrīcus
Nōn petimus prō omnibus, sed prō nōbīs parvulīs tantum.
Praeceptor
Atquī pluit, ut vidētis.
Guillelmus
Lūdēmus in pergulā.
Praeceptor
Quō lūsū?
Henrīcus
Pilā.
Praeceptor
Quid mihi dābitis?
Faber
Dīcēmus nōmina.
Praeceptor
Dīcite igitur.
Faber
Papier, charta. Tinte, ātrāmentum.
Guillelmus
Ein Buch, liber. Ein Büchlein, libellus.
Henrīcus
Eine Kirsche, cerāsum. Baumnüsse, iuglandēs.
Praeceptor
Quam bellī estis homūnculī. Lūdite ad cēnam usque.
Discipulī
Grātiās agimus, praeceptor.
Ēlocūtiō
- Salvē, praeceptor.
- Salvēte pariter omnēs.
- Praeceptor, licetne nōbīs per tē paulum lūdere?
- Impetrāvimus ā praeceptōre potestātem lūdendī.
- Nōn est nunc tempus lūdendī, sed dīscendī.
- Nōn lūdendī sed dīscendī grātiā missus est Athēnās.
- Petere veniam ab omnibus condiscipulīs suīs.
- Ego mālō veniā carēre, quam petere eam.
- Quid vultis vōs parvulī?
- Rogāmus, ut dēs nōbīs veniam lūdendī, praeceptor.
- Saxa pluunt.
- Lūdere in pergulā ... in forō ... in plāteā.
- Lūdere pilā ... āleā ... lūdere pār impār ... latrūnculīs lūdere.
- Dare alicui aliquid.
- Bellī estis homūnculī.
- Lūdere ad cēnam usque ... ad sēram usque vesperam.
- Lūdere lūsum, āleam vel āleā.
- Agere grātiās alicui.
- Agendae sunt praeceptōribus grātiae prō fīdēlī īnfōrmātiōne.
- Agō tibi grātiās, quam possum maximās.