Dialogī XLII - Dialogus Trīcēsimus Quārtus

Pius est mihi frāter.

Rāra haec avis est.

Frāter mihi est optimus.

Nōndum fortasse bona patria dīvīsistis. Quod sī quandō dēfūnctīs parentibus faciundum erit, ibi dēmum ērumpet inīquitās, tum ille turbae fīent.

Frātre meō nihil est melius.

Ille nōn tē fortasse, sed coelibātum tuum amat.

Amantissimus meī frāter est.

Est ita vīvendum, nisi cupiditās obstāret, ac sitis habendī.

Frātrī ūnicē chārus sum.

Hunc amīcum tibi fac servēs mūtuō amōre, officiīs ac pietāte.

Sunt & sorōrēs meī amantissimae.

Cūrā ut illae quoque tē suī amantissimum frātrem habeant, ita fīet ut exemptō rēbus hūmānīs commūnī patre, orbātās sē parente nōn sentiant.

Fōrmōsissimae sunt mihi sorōrēs.

Tantō magis vigilandum est tibi. Ad tūtandam enim pudīcitiam rēs inūtilis est fōrma.

Sorōrēs habeō venustissimās.

Studē nē diūtius habeās, virginea castitās nūllā melius arte quàm mātūrō servātur coniugiō.