Latine Loquor - Liber Quīntus - Colloquium Trīcēsimum Quīntum
Cōnfābulātiō dē profectiōnis in Ītaliam causā. Locōrum fāma et rērum novārum cupiditās nōs indūcunt ad peregrīnandum. Laus Ītaliae.
Persōnae:
Alexander, Benīgnus.
Alexander, Benīgnus.
Alexander
Salvē, ambulātor optātissimē.
Benīgnus
Et tū salvus sīs, cessātor occupātissimē.
Alexander
Satisne rēctē valēs, mī Benīgne?
Benīgnus
Immō rēctissimē, quae est Deī optimī māximī benīgnitās.
Alexander
Equidem ex animō gaudeō: tibīque vehementer grātulor reditum istum incolumem; ubi fuistī hōc tōtō annō?
Benīgnus
In Ītaliā.
Alexander
Quam ob causam animum indūxerās illūc proficīscī?
Benīgnus
Ob fāmam regiōnis: dē quā tam multa ubīque praedicantur. Nec ignōrās, quam sīmus rērum novārum cupidī.
Alexander
Sīc est nātūrā comparātum: sed quid illīc invēnistī?
Benīgnus
Certē multō plūra, quam ex fāmā audīveram.
Alexander
Multa, crēdō, vīdistī.
Benīgnus
Sed quod ad regiōnem attinet, terra est longē fertīlissima, omnī optimōrum frūctuum genere valdē abundāns, praecipuē vīnō praestantissimō.
Alexander
Scīlicet ea potissimum rēs tibi arrīdēbat.
Benīgnus
Ut vērum fatear, mīrē afficiēbat palātum.
Alexander
Sed quid tandem ēgistī in Ītaliā?
Benīgnus
Īnvīsī, animī grātiā, aliquot urbēs celebriōrēs: alicubī etiam studuī aliquamdiū.
Alexander
Quās urbēs īnvīsistī potissimum?
Benīgnus
Multās quidem vīdī in trānsitū: sed paucās contemplātus sum ōtiōsus; nimīrum Genuam, Flōrentiam, Venetiās, dēnique Rōmam illam, quae orbis terrārum caput dīcitur.
Alexander
Vīdistīne Summum Pontificem?
Benīgnus
Vīdī, cum in Templum Petriānum veherētur.
Alexander
Vīsitāvistīne etiam stātiōnem rādiophonicam Vāticānam?
Benīgnus
Ita sānē et ibi recordātus sum mātris meae, quae cotīdiē orandō comitātur rōsārium illinc ēmissum.
Alexander
Spērō tē quoque interdum mātris tuae ōrantis socium esse.
Benīgnus
Interdum sānē, sed fateor mē nōnnumquam circā eandem hōram aliās sequī cum amīcīs rādiō-ēmissiōnēs, tēlevīsiōnēs vel etiam spectācula cīnēmatōgraphica.
Alexander
Tibi similis es! Sed dīgressī sumus. Revertāmur ad iter tuum. In quibus oppidīs commorātus es studiōrum grātiā?
Benīgnus
Rōmā rediēns trānsiī Bonōniā, Pataviō, Mediōlānō. In hīs singulīs urbibus mēnsēs circiter trēs versātus sum in variō litterārum genere. Voluī enim ē singulīs paucula quasi dēgustāre.
Alexander
Quid autem vīdistī novī in tot celeberrimīs urbibus?
Benīgnus
Rogās? omnia ferē mihi nova vidēbantur: sed longum est omnia tibi nārrāre, praesertim nunc, cum mihi est aliquō properandum.
Alexander
Quō tandem?
Benīgnus
Ad patruum, quī mē ad cēnam invītāvit.
Alexander
Nōlō igitur tē remorārī diūtius, sed quandō licēbit nōbīs magis ōtiōsē cōnfābulārī?
Benīgnus
Crās post prandium, sī voluerīs.
Alexander
Ego vērō id percupiō.
Benīgnus
Ad hōram igitur prīmam exspectā mē in cubiculō.
Alexander
Fiet, hōra est ad merendam opportūna.
Ēlocūtiō
- Nōn satis rēctē valeō.
- Variē valuī.
- Rēctissimē valeō, quae Deī est benīgnitās.
- Grātulor tibi reditum incolumem.
- Nōn indūcō animum illīs crēdere.
- Indūxī animum proficīscī Rōmam.
- Rērum novārum cupiditās indūxit mē ad peregrīnandum.
- Plūra vīdī Venetiīs, quam ex fāmā audīvī.
- Terra frūctibus abundāns ... terra fertīlissima.
- Comparāre aliquid alicuī ... aliquid cum aliquō ... quaedam inter sē.
- Nūllō modō cum aliīs comparandus.
- Offerre argūmentum.
- Amāre ad dēliciās aliquem.
- Terra suā sponte prōdūcit flōrēs.
- Sūmere vīnum moderātē.
- Afficī animō ita ... afficī dēlectātiōne ... metū ... praemiō.
- Concipere cōgitātiōnēs.
- Exstinguere īgnem.
- Īnvīsere urbēs.
- Rōma orbis terrārum caput dīcitur.
- Trēs annōs circiter in variō litterārum genere versātus sum.
- Aliquem trānsīre ... ad hostēs ... flūmen, mare ... silentiō.
- Trānseat hōc.
- Remorārī aliquem ā rē aliquā ... remorārī spem alicuius.
- Īre in mīlitiam.
- Est bellī, mīlitiae.
- Valēdīcere litterīs.
- Iam prīdem bibliopolae fīlium cēpit litterārum satietās.
- Mātre invītā profectus est.
- Lūdere āleā ... lātrūnculīs lūdere vel proelia lātrōnum lūdere; manubriātō rēticulō ac pilā lūdere; manubriātī rēticulī lūdās.
- Āleam subīre.
- Frāter revēnit ex Galliā ... rediit birōtā automātāriā, rhaedā automātāriā, autocīnētō, aerōnavī, vēlīvolō.
- Sī rēctē meminit māter.
- Excipere aliquem vultū serēnō, fronte serēnā ... aliquem hospitiō.
- Excipere verba alicuius.
- Nōn sustineō tē aspicere.
- Sustinēre partēs cōnsulis ... aliquem auctōritāte suā.
- Nec salūtātiōne nec alloquiō pater dignātus est fīlium.
- Abī ē cōnspectū meō.
- Hāc nocte contubernālis meus nōn cubuit domī nostrae.
- Īra dēfervēscit.
- Mītīgāre patrem īrātum.
- Redīre cum aliquō in grātiam.
- Excandēscere īrā.
- Accipere aliquem graviter ... lēnīre īram ... cessātum est ā lūsū.
FĪNIS LIBRĪ QUĪNTĪ ET ULTIMĪ