Latine Loquor - Liber Quīntus - Colloquium Prīmum
Nūntius laetus dē studiīs.
Persōnae:
Albertus, Bernardus.
Albertus, Bernardus.
Albertus
Ecquid novī?
Bernardus
Accēpī litterās ā frātre, quī Lovāniī habitat.
Albertus
Quandō accēpistī?
Bernardus
Herī sub noctem.
Albertus
Quis attulit?
Bernardus
Piscārius.
Albertus
Quidnam intellēxistī ex istīs litterīs?
Bernardus
Omnia bene illīc sē habēre, quae ad studia pertinent.
Albertus
Vērane praedicās?
Bernardus
Exspectā, litterās ipsās ostendam tibi post prandium.
Albertus
Est profectō, quod nostrīs frātribus grātulēmur.
Bernardus
Scīlicet, quod Deō nostrō grātiās māximās agāmus.
Albertus
Id quidem praestāre dēbēmus omnī tempore: sed nunc māximē, cum audīmus ea, quae ad glōriam eius praecipuē pertinent.
Bernardus
Ō utinam hōc semper habēāmus in memoriā!
Albertus
Commūnicābis igitur mēcum tuās litterās?
Bernardus
Ut prōmīsī.
Albertus
Ergō post prandium.
Bernardus
Etiam dubitās?
Albertus
Intereā valē.
Bernardus
Valē, et salvē, Alberte.
Ēlocūtiō
- Ecquid novī habēs? Numquid novī?
- Sī quid novī habēs, fac mē certiōrem.
- Accipere litterās ab aliquō.
- Litterae tuae mihi herī sub noctem redditae, trāditae sunt.
- Schedae tuae meās ad manūs pervēnērunt.
- Quidnam intellēxistī ex litterīs istīs?
- Quid continent litterae?
- Omnia bene sē habent, quae ad valētūdinem pertinent.
- Pertinet ad Deī glōriam.
- Commūnicā mēcum litterās tuās.
- Commūnicāre aliquid cum aliquō, cum aliquō dē rē aliquā, aliquem aliquā rē.
- Commūnicāre inter sē aliquid, vel, inter sē dē rē aliquā.