Latine Loquor - Liber Quārtus - Colloquium Quadrāgēsimum Tertium
Sebastiānus iubētur scrībere ad patrem cūiusdam puerī dē remittendō ad scholam fīliō.
Persōnae:
Praeceptor, Sebastiānus.
Praeceptor, Sebastiānus.
Praeceptor
Hodiē igitur Petrum convēnistī?
Sebastiānus
Hodiē.
Praeceptor
Ubi?
Sebastiānus
In sacrā aede.
Praeceptor
Quotā hōrā?
Sebastiānus
Octāvā mātūtīnā.
Praeceptor
Numquid rogāstī, quandō sit repetītūrus scholam?
Sebastiānus
Rogāvī.
Praeceptor
Quid ille?
Sebastiānus
Nesciō, inquit.
Praeceptor
Dēbuistī illum ad reditum exhortārī.
Sebastiānus
Id ego fēcī, et multīs quidem verbīs.
Praeceptor
Bene fēcistī: sed quid ille respondit?
Sebastiānus
Sē adhūc ā patre dētinērī ad frūctūs colligendōs.
Praeceptor
Quid sī ad ipsum patrem scrībās dē statū nostrō scholāsticō? Fortasse enim movēbitur, quō fīlium citius remittat.
Sebastiānus
Sī tibi ita vidētur, faciam, idque dīligenter.
Praeceptor
Fac igitur quam prīmum: sed audī, scrībe plēnissimē: deinde litterās tuās mihi ostende, priusquam dēs perferendās.
Sebastiānus
Sēdulō faciam, praeceptor.
Ēlocūtiō
- Repetere scholam.
- Exhortārī aliquem ad aliquid ... multīs verbīs.
- Dētinērī ab aliquō.
- Nūdius tertius scrīpsī ad patrem meum dē statū nostrō scholāsticō.
- Quō in statū sunt rēs vestrae scholāsticae?
- Remittere puerum ad scholam.
- Iussus sum scrībere ad patrem meum dē remittendō ad scholam frātre meō.
- Quid tibi vidētur ... vidēris mihi dīligēns.
- Scrībe plēnissimē ad prīncipem.
- Ostende mihi litterās tuās, priusquam dēs perferendās.
- Cūrā hās litterās quaesō perferendās Rōmam.