Latine Loquor - Liber Quārtus - Colloquium Vīcēsimum Secundum
Praemium victōriae causā petunt iuvenēs: dātur ā magistrō, sed nōn sine admonitiōne. Obligātur aliquis ex prōmissō. Sōlus Deus successum dat studiīs. Sine Deō omnia vāna.
Persōnae:
Henrīcus, Praeceptor, Hadriānus Observātor.
Henrīcus, Praeceptor, Hadriānus Observātor.
Henrīcus
Praeceptor, vīsne dare parvum praemium?
Praeceptor
Quam ob rem?
Henrīcus
Victōriae causā.
Praeceptor
Ubi sunt comparēs tuī?
Henrīcus
Adsunt, Hūgō et Audāx.
Praeceptor
Heus, observātor, suntne hī victōrēs hāc hebdomadā?
Hadriānus
Habent notās omnium paucissimās.
Praeceptor
Ergō sunt victōrēs: quid aliud ex tē quaerō? Vōs igitur quod praemium petītis?
Henrīcus
Quod tibi placuerit.
Praeceptor
Quō tandem iūre dēbeō?
Henrīcus
Ex prōmissō.
Praeceptor
Aequum dīcitis. Quidquid enim rēctē prōmissum est, praestārī dēbet.
Henrīcus
Sīc ex tē didicimus.
Praeceptor
Ecce vōbīs pennae singulae ad scrībendum: ac, nē putāveritis vulgārēs eās esse, ex eārum sunt genere, quae vulgō Hollandicae appellantur.
Henrīcus
Grātiās agimus, praeceptor.
Praeceptor
Quīn potius agite Deō, omnium bonōrum auctōrī, quī dat studiīs vestrīs successūs prosperōs: vōs autem in litterārum studiō pergite dīligenter.
Henrīcus
Dabimus operam, quantum iuvābit ille Pater optimus.
Praeceptor
Sine eius ope vāna sunt nostra omnia.
Ēlocūtiō
- Dare praemium.
- Victōriae causā.
- Petrus habet omnium vitia paucissima.
- Quaerere aliquid ex aliquō.
- Quaerere aliquem.
- Quō iūre dēbeō tibi praemium? Ex prōmissō.
- Quidquid rēctē prōmissum est, praestārī dēbet.
- Hae pennae nōn sunt vulgārēs, sed Hollandicae.
- Deus bonōrum omnium auctor.
- Det Deus studiīs vestrīs successūs prosperōs, benedīcat studiīs vestrīs.
- Pergere in studiō litterārum, prōsequī studium litterārum.
- Sine Deī ope vāna sunt nostra omnia.
- Ferre opem alicui, venīre alicui subsidiō, ferre suppetias alicui.