Latine Loquor - Liber Quārtus - Colloquium Decimum
Pūblica tūtōris admonitiō ad condiscipulōs in conclāvī commūnī. Admonitiōnis summa: nē discipulī tempore abūtantur. Extemporālis respōnsiō cuiusdam prīmae classis discipulī.
Persōnae:
Tūtor, Dōnātus.
Tūtor, Dōnātus.
Tūtor
Dēsinite, ō puerī, garrīre absentē magistrō.Verba, quibus summus laeditur ille Pater.
Dē studiīs potius tractāte et rēbus honestīs:
Discite sermōnēs, aptaque verba loquī.
Discite et inter vōs reddenda revolvere saepe:
Doctor enim puerīs semper adesse nequit.
Discite sectārī vestīgia certa bonōrum:
Ōtia vōs fallant blanda cavēte precor.
Ēn ego praemoneō, vōs nē dēlectet abūtī
Tempore: nē tergum verbera dūra premant.
Ecce iterum vōbīs mōrum praedīcō magister.
Sī quis erit caesus, nē mihi det vitiō.
Dōnātus
Dēsine plūra loquī: nēmō pārēre recūsat:Est monitor nōbīs optimus ille Pater:
Illiusque Patris Nātus, cui nōmen Iēsus:
Et quī nōs renovāns Spīritus intus alit.
Tūtor
Quem mihi spērāssem tam respondēre parātum?Quis puer angelicōs mittit ab ōre sonōs?
Ō quam tē memorem nostrae doctissimē classis?
Nam tibi dīvīnum carmen ab ōre fluit.
Nōn sum tam fēlīx, ut fundam ex tempore versūs:
Sed modo quae dīxī, praemeditātus eram.
Dōnātus
Sī meditātus erās, quī nunc tam fundis apertē Castaliōs laticēs? quis furor iste novus?
Tūtor
Nam tua mē tantīs mōvērunt carmina flammīs;Ut mihi nunc videar posse movēre ferās.
Dōnātus
Sed cūr immeritum tantīs mē laudibus effers?Est tribuenda ūnī glōria summa Deō.
Atque utinam ēloquium nōbīs spatiumque darētur,
Et nostra in laudēs solveret ōra suās.
Sed quia tempus adest, ut vōce et mente precēmur
Idque iubet doctor, dēsinō plūra loquī.
Ēlocūtiō
- Nōn licet discipulōs garrīre absentē professōre.
- Laedere aliquem verbīs.
- Tractāre dē studiīs.
- Revolvere saepe reddenda.
- Magister discipulīs semper adesse nequit.
- Sectārī vestīgia bonōrum.
- Ōtia blanda fefellērunt eum.
- Verbera dūra prēment tergum vestrum.
- Tibi erunt parāta verba, huic hominī verbera.
- Dare vitiō alicui aliquid.
- Nēmō recūsat pārēre.
- Recūsāre mūnus.
- Deus fuit nōbīs monitor.
- Nātus patris.
- Quem mihi spērāssem tam respondēre parātum?
- Ad utrumque parātus respondit.
- Mittere ab ōre sonōs angelicōs.
- Memorāre dē aliquā rē, aliquid.
- Dīvīnum carmen tibi fluit ab ōre.
- Fundere versūs ex tempore.
- Praemeditārī aliquid.
- Fundere laticēs Castaliōs.
- Nūllā rē movērī potest.
- Carmina tua mōvērunt mē tantīs flammīs, ut mihi nunc videar posse movēre ferās.
- Efferre aliquem laudibus.
- Glōria tribuenda est Deō ūnī.
- Solvere ōra in laudēs Deī.
- Precārī vōce et mente.