Latine Loquor - Liber Prīmus - Colloquium Quārtum
Exōrdium est colloquendī. Quī bene agit, nōn timet, nē reprehendātur. Prūdenter igitur facit, quī praeceptum illud ūsurpat: Sīc age, nē timeās.
Persōnae:
Gabriēl, Hierōnymus.
Gabriēl, Hierōnymus.
Gabriēl
Iamne tenēs, quae reddenda sunt hōrā tertiā?
Hierōnymus
Teneō.
Gabriēl
Ego quoque.
Hierōnymus
Ergō cōnfabulēmur paulisper.
Gabriēl
Sed sī intervēnerit observātor, putābit nōs garrīre.
Hierōnymus
Quid timēs, ubī nihil timendum est? Sī vēnerit, nōn dēprehendet nōs in ōtiō aut in rē malā: audiat, sī velit, nostrum colloquium.
Gabriēl
Optimē loqueris: sēcēdāmus aliquō in angulum, nē quis nōs impediat.
Ēlocūtiō
- Teneō, quae reddenda sunt hōrā tertiā.
- Quid hodiē nōbīs reddendum est?
- Cōnfābulārī cum amīcīs.
- Observātor intervēniet.
- Observātor sī intervēnerit, notābit tē.
- Praeceptor audīvit nōs garrīre.
- Nōn timeō observātōrem.
- Quid timēs, ubī nihil timendum est?
- Timēre aliquem ... Deum, magistrum.
- Dēprehēnsus est in ōtiō ... in fūrtō.
- Dēprehendere aliquem ... fūrēs dēprehēnsī sunt ... suspēnsī sunt.
- Audiat, sī velit, nostrum colloquium.
- Loqueris bene, melius, optimē, male, peius, pessimē.
- Sēcēdere in locum aliquem.
- Impedīre aliquem.
- Impedīrī in aliquā rē ... impedīrī morbō, aetāte.