Dialogi Pueriles — Dialogus Quintus

Deus auspicatum tibi conferat annum.

Et tibi det omnia alba contingant.

Quid vero mihi pro xeniolo vel strenula mittes?

Qui tibi mittam, cum nec obulus ad emendos panes suppetat, quo latrantem stomachum exatiam?

Ego vel Calabri hospitis munera boni consulam.

Ego arbitror patrem brevi advolaturum, quod si advenerit, omnia in portu erunt; et ne asymbolus apud te sim, curabo.

Non soleo lubenter spem precio emere.

Si expectare non vis, praevertere hebrum potes.

Unde quaeso missitandorum munerum ratio apud Christianos radices egit?

Tute lepus es, et pulpamentum quaeris?

Ego, quantum ab aliis habeo, referam. Arbitror primum illis xeniolis homines sese mutua salute impartire, et veluti aggratulari quod Dei benignitate incolumes totius anni spatia emensi sint. Vel quod propius vero est, quia illis feriis tres Magi mysticis quibusdam muneribus Christum regem demeriti sunt. Sic Christiani in Christianae charitatis symbolum apophoretis mutuo amicitiam iungunt.

Non a veritate abhorrent quae edisseris; sed Circumcisionis feriae cur quaeso ab ecclesia institutae sunt?

Non in Theologorum harena non unquam exercitus sum, sed tamen quae ab aliis audivi recensebo. Circuncisionis feriae propterea peragantur ut quemadmodum Christus in praeputii carne amputatus est, sic et nos ab affectibus amputemur, exesas ipsarum voluptatum carnes excindentes, ne animae lepram adferat. Ita enim quidam dicebat Hieronymum illum sacrum in libro de vera circuncisione disputare.

Quandoquidem in Theologorum campo iam congressus es, Epiphania unde nomen promeruit?

Quanquam haec a nostra professione parerga sunt, et quasi extra oleas (ut dicitur), tamen quae a praeceptore olim praelegente excepi in sinum tuum effundam: ἐπιφάνια dicta ἀπὸ τοῦ ἐπιφαινέω, hoc est appareo, nempe quod tunc Christus Magis ipsis, nostra indutus carne, apparuerit. Nec vero Magos accipies maleficos quosdam fuisse (ut Augustinus vult), sed sapientiae studiis deditos et syderum cursus peritos, ex felicissima Arabia prodiisse, in qua ex auro et argento vasa, lectos, tripodes facere consueverant, qua de re praeceptor noster Picum Francisci in libro praenotionum adducebat. Iam habes uno (ut dicitur) verbo quod a me petiisti.

Et iam ad vesperarum precum sacrificium eundum est, si non plagas lucrifacere volumus.