Colloquiōrum Puerīlium Fōrmulae — Nicolaus et Cornēlius
Scholastica
Persōnae:
Nicolaus, Cornēlius
Nicolaus, Cornēlius
NICOLAUS ET CORNĒLIUS.
Nicolāus
Ō Faustum & foelīcem hunc diem.
Cornēlius
Nicolāe adēs, audī paucīs, resiste.
Nicolāus
Ō Cornelī mi opportūne, optimē tē mihi offers, nēmō est quem mālle omnium, tē mihi ipsum exoptābam darī.
Cornēlius
Quid novae reī est? quid est quod sīc gestīs? quid tam laetus es? narra isthuc quaesō quid sit.
Nicolāus
Nūntium affero tibi laetissimum futūrum.
Cornēlius
Narra obsecrō, quaesō tē ut narrēs.
Nicolāus
Orbilius noster peregre profectūrus est.
Cornēlius
Ain' tū?
Nicolāus
Sīc est.
Cornēlius
Dic sodēs, dīc vērum.
Nicolāus
Dīxī.
Cornēlius
Bonan' fidē?
Nicolāus
Bona hercle, nōn mihi crēdis? adeòn' parva mihi apud tē est fidēs?
Cornēlius
Hariolāre.
Nicolāus
Nōn id dīcas sī faciās quod ego, postrēmo patiar mihi dēcīdī collum sī falsum dīco.
Cornēlius
Deus sum sī hoc ita est.
Nicolāus
Vērum reperiēs, sine bīduum hoc praetereat modo.
Cornēlius
Num mē lūdis? iocō dīcis an sēriō? iocāre, lūdis mē fortasse.
Nicolāus
Iocārī tibi videor? lūdere mē putās? mē vidē.
Cornēlius
Obsecrō nē mē in laetitiā frustrā coniciās.
Nicolāus
Ego isthuc facerem? ecquid mihi lucrī sit sī mentiar?
Cornēlius
Sed quī scīs?
Nicolāus
Sciō.
Cornēlius
Unde scīs?
Nicolāus
Certō sciō.
Cornēlius
Quo indiciō, quī crēdam ita esse?
Nicolāus
Nōn expedit dīcere, nōn opus est dictō.
Cornēlius
At sciō mihi opus est.
Nicolāus
Promittis silentium?
Cornēlius
Quasi nōn nōrimus nōs inter nōs.
Nicolāus
Sī mihi fidem dās tē tacitūrum dīcam.
Cornēlius
Dō fidem.
Nicolāus
Certam?
Cornēlius
Certissimam crede inquam mihi.
Nicolāus
Dīcam in aurem.
Cornēlius
Quid opus? cum nullus sit in propinquo quī nōs exaudiat.
Nicolāus
Ita mos est, admovē aurem.
Cornēlius
Age inepte.
Nicolāus
Nōn sīgnī sat est? ex hoc coniectūra facile fit.
Cornēlius
Opinor magnum sīgnum.
Nicolāus
Opinor narrās? nōn rectē accipis, certa rēs est.
Cornēlius
Faxit Deus, nē tū mihi ⟦albūm apud portas nuncium⟧, voluptātem magnam mihi nunciēs, optā ergo quidvīs tibi.
Nicolāus
Quid sī optābo?
Cornēlius
Deum ōrāto ut eius tibi faciat cōpiam.
Nicolāus
Rides?
Cornēlius
Vtinam ita quidem detineātur ut mense hoc perpetuo nequeat huc recurrere.
Nicolāus
Ita velim. Ego interim dum tyrannus aberit noster, nunc pilā, nunc saltū, nunc alio atque alio lūsū mē oblectāre cōnstituī, atque animō obsequi, quid tu ais?
Cornēlius
Sānē cēnseo: Sed ut diei tempus est in lūdum properāre oportet, vidētur tempus esse ut scholam repetāmus, iam tempus arbitror eundī in lūdum, quī nōn adfuerit ante pulsātiōnem fīnītām, mulctābitur sextā drachmae parte.
Nicolāus
Vtinam domī sim, urget mē ventris onus, cōgor adīre latrīnam, quōta hora est? iamne quinta sonuit?
Cornēlius
Nōn audīvī campānae sonum, vērum haud opinor, suspicor haud longē quintā abesse, īnstat nī fallor.
Nicolāus
Possumne intereā mē domum cōnferre, atque etiam redīre mē rursum tempori?
Cornēlius
Sī properāre volēs, sed interim nōn opperiar tē, longum esset mē expectāre dum redeās.
Nicolāus
I sānē prae, iam ego sequar.