Colloquiōrum Puerīlium Fōrmulae — Nicolāus et Arnoldus
Lūsus puerīlēs
Persōnae:
Nicolāus, Arnoldus
Nicolāus, Arnoldus
NICOLĀUS ET ARNOLDUS.
Nicolāus
Plūrimum tē salvēre iubeō Arnolde.
Arnoldus
Salvē mi ⟦Prasnī⟧.
Nicolāus
Ad tē ībam.
Arnoldus
Commodum profectō, atque ego ad tē.
Nicolāus
Tē quaerēbam ipsum.
Arnoldus
Et ego tē.
Nicolāus
Optātō advenis.
Arnoldus
Quid autem? quidnam?
Nicolāus
Vīsne collūdāmus à prandiō? Invītat multa, animus cupidissimus, caelum blandissimum, diēs lūdō cōnstitūtus.
Arnoldus
Cupiō, nihil est quod mālim, sī liceat modo, sī contigerint feriae.
Nicolāus
Oh, dubiumne id est? haud dubium est mihi.
Arnoldus
Id tū nostī vidēlicet.
Nicolāus
Certum est.
Arnoldus
Imò admodum in ambiguō est etiamnum, sed mihi nōn erit integrum in lūdum īre hōrā prīmā.
Nicolāus
Domī mē igitur operīre, nisi quid est quod māvis. Domī adsīs facitō.
Arnoldus
Imò in templō.
Nicolāus
At mātūrē.
Arnoldus
Fīet, ubi prīmum poterō.
Nicolāus
Nē omitte quīn veniās, cavē nē mē frustrēris, cavē mihi verba dederis, nē fefelleris mē.
Arnoldus
Haud faciam, quin mē vix antevertēs, prius illīc erō, quam tū.
Nicolāus
Rēs indicābit. Valē igitur in hōram prīmam.
Arnoldus
Et tū. Itáne convēnerat, bone vir? nunc dēmum venis, quur tam sērō? quur nōn vēnistī sīcut erās pollicitus? ego iamdūdum hic adsum.
Nicolāus
Erat negōciī quiddam, & diūtius commorātus sum in viā quam putāram, Ioannēs in causā fuit quō sērius vēnerim. Petrus mihi in mōrā fuit, mē remorātus est, is dum huc veniō, mihi forte fit obviam.
Arnoldus
Is quī nunc nūper ē Galliā rediit?
Nicolāus
Is, ipse, īnstitit ōrāre ut ūnā sēcum īrem.
Arnoldus
Quōnam?
Nicolāus
Domum suam.
Arnoldus
Incommodē Hercle.
Nicolāus
Illūd liquet mihi dēierāre hīs hebdomadis tribus aut quatuor nōn vīdisse proximīs, nisi nunc quum minimē opus fuit.
Arnoldus
Dūxtin' tēcum Guilielmum nostrum Pancratium?
Nicolāus
Vellem quidem, utinam.
Arnoldus
Quur nōn? Prōmīsit igitur sēse ventūrum?
Nicolāus
Nē ⟦istābus⟧ quidem, cēterum nōn convēnī hominem.
Arnoldus
Quāmobrem tandem?
Nicolāus
Quia nōn iusserās, nec in mentem vēnit.
Arnoldus
Ubi nunc est ipse?
Nicolāus
Mīrum nī domī est.
Arnoldus
Quem lūdum potissimum auspicābimur? quod lūsus genus placet?
Nicolāus
Quod vīs?
Arnoldus
Quod tibi idem mihi lubet.
Nicolāus
Vīs mēcum certāre pilā?
Arnoldus
Equidem sum pilae prōrsus indoctus. Istīus lūdī rudis sum ut quī maximē.
Nicolāus
Vīs igitur mēcum saltū contendere, aut palaestrā, aut iaculō, aut discō? Age
Sī qua tibi virtus animusque in corpore praesēns.
Huc adsīs.
Arnoldus
Nōn ausim, istīs quidem mē longē vincis.
Nicolāus
Vīn' cursū atque recursū adversīs spatiīs certēmus? aut contendāmus cursū ad mētam. En stadium nōn incommodum. Hoc locō sit linea, palus ille sit mēta.
Arnoldus
Equidem nōn recūsārim sī plūrēs sīmus, at inter duōs frīgent istī lūsūs.
Nicolāus
Collūsitēmus igitur tālīs, aut sī māvis nucibus.
Arnoldus
Dēsunt mihi.
Nicolāus
Quid sī trānsiliāmus fossās?
Arnoldus
Sī ⟦praeesseris⟧ sequar.
Nicolāus
Aut piscēmur hāmō, est mihi ūnus aut alter perquam elegāns.
Arnoldus
Vereor nē fūnis nihil attrahat.
Nicolāus
Faciāmus perīculum, casūs ubique valet.
Arnoldus
Scilicet ut diū pendeat hāmus, semperque inānem retrahās.
Nicolāus
Nōn semper ô bone, vērum ipse potius praescrībitō lūsus genus, sequar quōcunque vocāris.
Arnoldus
Mittāmus globōs ad paxillum ē terrā prōminentem, aut lūdāmus sphaerīs per anulum ferreum. Dē hīs enim lūdīs nēminem metuō ūnā aetāte quī sit, aliīs certāminibus cēdō, neque enim est, ut vir ūnus omnia nōrit, neque omnia possumus omnēs.
Nicolāus
Age ut vīs, nihil dētrectō, nec dē istīs quidquam tē metuō, sed quōnam locō?
Arnoldus
In hortō nostrō, sunt nōbīs sphaerae perquam elegantēs, vōlae aptissimae, ārea commodissima.
Nicolāus
Sed tibi nimium nōta.
Arnoldus
Ut sit, nec tibi inexperta est.
Nicolāus
Age age placet ut dīcis, ac mihi istud nōn in mentem venerat. Vērum licetne istīc lūdere per mātrem?
Arnoldus
Maximē, quid nī liceat? modo nē quid damnī dēmus.
Nicolāus
Cavēbitur.
Arnoldus
Eāmus ergō, ecquid stāmus? quid cunctāmur? nihil est quod hic morēmur diūtius.
Quī fīnis standī, aut quō nōs decet ūsque morārī?
Iamne īmus?
Nicolāus
Ubi lubet, cūrābō modo librum meum domum dēferendum, dēferam librum meum domum, sī patēris, mox huc revertar.
Arnoldus
Mē lubente faciēs, & Petrum frātrem tuum, sī domī erit, rogā velitne ūnā lūdere. Sin aut abest aut friget, cōnfīdō Ioannem Segerum nōn gravātūrum, haud gravātim factūrum.
Nicolāus
Quaesō ut tantisper expectēs mē, hic manē quaesō dum redeam, paruisper operīre mē hic.
Arnoldus
Ita faciam, propera ergō, abī properē, vola.
Nicolāus
Iam inquam hic aderō.