Colloquiōrum Puerīlium Fōrmulae — Iōannēs et Petrus

Persōnae:
Iōannēs, Petrus

IŌANNĒS ET PETRUS.

Petrus

Ioannes quaesō ut doceās mē lēctiōnem.

Iōannēs

Nōn est nunc commodum, in praesentiā nōn vacat mihi, nam ipse meam nondum teneō.

Petrus

Obsecrō tē, vel semel.

Iōannēs

Quīn omitte mē.

Petrus

Ō mi lepidissime Ioannes.

Iōannēs

Frustrā canis, surdō loqueris.

Petrus

Adeōne tē praefractum esse atque inexōrābilem?

Iōannēs

Adeōne molestum atque impudentem esse?

Petrus

Nequeō tē exōrāre unum hoc modō?

Iōannēs

Obtundis.

Petrus

Amābō tē haud grave est, facilis est tantillī temporis iactūra, aut potius nūlla.

Iōannēs

Age accēde huc ad mē, quae tua est lēctiō? quam lēctiōnem redditūrus es?

Petrus

Hanc.

Iōannēs

Attentus estō, intende oculōs.

Petrus

Istīc sum.

Iōannēs

Satis tibi est? nunc satis tenēs?

Petrus

Haud sciō.

Iōannēs

Fac perīculum, recitātō semel. Peccās, isthuc perperam reddis, ad hunc habet modum, iam scīs?

Petrus

Propemodum.

Iōannēs

Redde nunc dē integrō, probē, isthuc rectē, bene habet, praeceptor tē accersit.

Petrus

Eō.

⟵ Previous Next ⟶