Colloquiōrum Puerīlium Fōrmulae — Heimanus et Iacobus
Importūnus
Persōnae:
Heimanus, Iacobus
Heimanus, Iacobus
HEIMANUS ET IACOBUS.
Heimanus
Heus heus Iacobe, resiste parumper, expectā paulisper, paucīs tē volo, est quod tē velim, audīn' Iacobe?
Iacobus
Quī mē vocat?
Heimanus
Quō, malum, sīc properās? quur adeō curris? equidem tē nequeō cōnsequī tam strēnuē.
Iacobus
Opus est.
Heimanus
Adeōne properās?
Iacobus
Ita est, sed quid mē vīs? quid reī est? expectō quid velīs, quin tū ūnō verbō dic quid est quod mē velīs.
Heimanus
Īre tēcum.
Iacobus
Alium comitem nunc quaere tibi, nam mihi festīnātō est opus.
Heimanus
Quāmobrem?
Iacobus
Quaere quī respondeat.
Heimanus
Quid gravāris obsecrō?
Iacobus
Nē mihi sīs in mōrā, in praesentiā nōn est ōcium, valeās.
Heimanus
Tamen audī paucīs.
Iacobus
Surdus sum.
Heimanus
Quaesō paulisper.
Iacobus
Nōn possum.
Heimanus
Fac possīs.
Iacobus
Māter mē expectat, parāta mihi erunt verba, lītēs audiam sī quid cessāverō.
Heimanus
Nōn fīet quin ibo tēcum ūnā.
Iacobus
Quin omitte mē, molestus nē sīs.
Heimanus
Comitābor tē quō properās.
Iacobus
Dēsine, nōlo tē nunc comitem.
Heimanus
Sīcine est sententia?
Iacobus
Sīc.
Heimanus
Certumne est isthuc?
Iacobus
Certum.
Heimanus
Abī quō dignus es cum tuō fastidiō impūne, oberit tibi aliquandō, sine, sine.
Iacobus
Eia nimis īrācundus es.
Heimanus
Nimis ipse ineptus es, quī nunc tam es difficilis, quur tibi sum molestus comes?
Iacobus
Mitte iam isthaec, missa haec faciāmus nam properō.
Heimanus
Age, vīsne crās adeāmus Carthusiēnsēs?
Iacobus
Nōn licēbit mihi, līberum mihi nōn erit.
Heimanus
Quid tandem? quī cedo? quid causae est? quid obstat? quur nōn licēbit?
Iacobus
Domī manendum erit mihi, nam habēbimus aedes plēnās convīvārum tum aut via est incommodior propter assiduōs imbrēs.
Heimanus
Saltem diē lūnae proximō.
Iacobus
Affirmāre istud tibi nōn possum.
Heimanus
Ipse igitur mihi diem cōnstituās, dīcās, praescrībās ad quem mēcum sīs itūrus.
Iacobus
Quum erit commodum, ōcium ubi erit.
Heimanus
Ut lubet fastidiōse, inveniam alium sī tū recūsās, sī tū nōlis facile mihi reperiētur alius, nōn tibi supplicābo.