Colloquiōrum Puerīlium Fōrmulae — Garrulus et Horātius

Quid agis dulcissime rērum?

Suāviter ut nunc est, & cupiō omnia quae vīs, nunquid vīs?

Nōris nōs, doctī sumus.

Plūris hoc mihi eris.

Misere cupis abīre iamdūdum, videō sed nihil agis, ūsque tenēbo: persequar hinc, quō nunc iter est tibi.

Nihil opus est tē circumagī, quendam volo vīsere nōn tibi nōtum: trāns Tyberim longē cubat is, prope Caesaris hortōs.

Nihil habeō quod agam, & nōn sum piger, ūsque sequar tē. Sī bene mē nōvī, nōn Viscum plūris amīcum, nōn Varium faciēs: nam quis mē scrībere plūrēs, aut citius, possit versūs quis membra movēre mollius? invideat quod & Hermogenēs ego canto.

Est tibi māter, cognātī, quīs tē salvō est opus?

Haud mihi quisquam, omnēs composuī.

Foelicēs, nunc ego restō: cōnfice, namque īnstat fatum mihi trīste, Sabella quod puerō cecinit dīvīnā mōta anus urnā. Hunc neque dīra venēna: neque hostibus auferet ēnsis, nec laterum dolor, aut tussis, nec tarda podagra, garrulus hunc quandō cōnsūmet cunque, loquācēs, sī sapiat vītet simul atque adolēverit aetās.

Nunc respondēre vadātō debeō: quod nī faciam, perdenda līs est, sī mē amās paulum huc adeō.

Intereām, sī aut valeō stāre, aut nōvī cīvīlia iūra: & properō quō scīs.

Dubius sum quid faciam, tēne relinquam, an rem.

Mē sodēs.

Nōn faciam. Maecēnas quōmodo tēcum? homo est paucōrum hominum & mentis bene sānae, nēmō dexterius fortūnā est ūsus, habērēs magnum adiūtōrem, posset quī ferre secundās, hunc hominem sī vellēs trādere, dispeream nī summōssēs omnēs.

Nōn istō vīvimus illīc quō tū rēre modō. Domus hāc nec pūrior ūlla est, nec magis hīs aliēna malīs, nihil mihi officit unquam, dītior hīc, aut est quia doctior. Est locus ūnicuique suus.

Magnum narrās, & vix crēdibile.

Atquī sīc habet.

Accendis, quāre cupiam magis illī proximus esse, velīs tantummodo, quae tua virtūs, expugnābis: & est quī vincī possit.

Eōque difficilēs aditūs prīmōs habet.

Haud mihi dēerō, mūneribus servōs corrumpam, nōn hodiē sī exclūsus fuerō, dēsistam, tempora quaeram, occurram in triviīs, dēdūcam, nihil sine magnō vīta labōre dedit mortālibus.