Paedalogia - Dialogus Tertius

Salvē, mī Paule.

Et tū, sodālium iūcundissimē, Petre. Sed quid adeō es trīstis? Nam ex quō commūnia studia īdemque hic lūdus mūtuā nōs familiāritāte iūnxērunt, vultū alacrī et fēstīvō mihi semper es vīsus, ut ex hīs, quōs hīc habet lūdus, fuerit nēmō, quī nōn tē familiāriter ūtī concupīverit. Nunc nesciō quōmodo alius vidēris.

Et mīrum tibi vidētur, sī vultū sum trīstī, cum eiusmodī quiddam mihi accidat, quod studiōrum meōrum prōgressum nōn parum queat remorārī?

Quid illud, quaesō? Nam grave aliquid sit oportet, quod tē adulēscentem cōnstantem ā studiīs dēdūcat.

Dīcam paucīs. Iam annus fermē est, ex quō lūdī huius nostrī celebritāte excitus hūc ad capiendum ingeniī cultum concessī; quō tempore studiōrum meōrum vix ratiōnem invēnī, cum mihi ē patriā offeruntur litterae, quae mē domum quasi ex mediō studiōrum cursū revocant. Et quod mē omnium maximē male habet, reditūs meī causās nōn edunt. Nec scīre possum, an hūc tandem liceat remigrāre.

Quī scīs, an ad fortūnam aliquam āvocēris?

Nūlla mihi fortūna potest incīdere tantā, cuius respectū litterās queam posthabēre.

At parentibus est obsequendum.

Hoc illud est, quod mē movet, quod mē hinc domum extrūdit. Aliōquī, tametsī nōn tantum est āēris, quō hanc hiemem trānsmittere queam, tamen prae studiōrum amōre vīctum mendīcandō ōstiātim quaeritāssem.

Nōn antequam hinc abeās nunquam forsan reditūrus, convīvium inter nōs agitābimus?

Convīvia agitārem, quī ad supellectilis meae sarcinam compōnendam vix tempus habeō? Immō iam rēctā ad lūdīmagistrum pergō missiōnem efflāgitātūrus ; quam ubi fuerō cōnsecūtus, conterrāneōrum meōrum litterīs, quās ad parentēs suōs mihi dabunt, acceptīs statim iter ingrediar. Quārē rēctissimē valē, mī Paule, mūtuae nostrae cōnsuētūdinis memor. Quod sī quandō dabitur ōtium, fac dē studiōrum tuōrum ratiōne et lūdī huius statū mē litterīs tuīs certiōrem reddās.

Faciam sēdulō, mī Petre, et lubēns quidem; sed heus tū...

Quid est?

Conterrāneōs tuōs, quōrum cōnsuētūdō, dum hīc erant, utrīque nostrum erat grāta, meō nōmine dīligenter salūtēs velim.

Sat est: faciam.