Dialogi Sacri - Dialogus Duodecimus (Liber Quartus)

Cūr faciunt discipulī tuī contrā īnstitūtum antīquōrum, ut cibum capiant illōtīs manibus?

Cūr & vōs contrā praeceptum Deī facitis, īnstitūtō vestrō? Deus enim (ut ait Mōsēs) parentem utrumque colī praecēpit; &, sīquis patrī mātrīve maledīxerit, eum morte multārī. At vōs ita hominēs īnstituitis, ut parentibus dēmōnstrent, dōnāria ā sē in fiscum templī collāta, in ipsōrum parentum ūtilitātem esse cessūra. Ita estis in causā, ut nihil ad illam honōris speciem addant, dum sē satis parentibus facere arbitrantur, sī in templum dōnāria cōnferant, quamvīs parentibus nōn, ut dēbent, subveniant; quō vestrō īnstitūtō Deī praeceptum rescīdistis. Multa sunt ēiusdem generis alia, in quibus dum hominum īnstitūta tenētis, Deī praecepta omittis: lōtiōnēs urceōrum & pōculōrum, & cētera ēiusmodī. Ō hominēs, rēctē vāticinātus est dē vōbīs Ēsaiās, ubi ita dīcit. Hīc populus ad mē ōre accēdit, & mē labīs colit, sed animō procul ā mē absunt. Vērum frūstrā mē ex īnstitūtīs praeceptīsque hominum venerantur. Sed attendite, omnis multitūdō, & intellegite. Nōn quod intrat per ōs, coinquinat hominem: sed quod exit per ōs, hoc vērō coinquinat hominem. Sī quis habet aurēs ad audiendum, audiat.

Ecquid scīs, Pharīsaeōs istō tuō dictō esse offēnsōs?

Omnis stirps ā Patre meō caelestī nōn plantāta, exstirpābitur. Sinite eōs: ducēs sunt caecī caecōrum. Quod sī caecus caecum dūcat, ambō in foveam cadent.

Ēdissere nōbīs sententiam istam.

Adeōne etiam vōs tardī estis? Aut nōndum intellegitis, nihil quod extrīnsecus in hominem intrat, posse eum coinquināre? Nōn enim in cor penetrat, sed in ventrem fertur, & in latrīnam per excrēmenta cibōrum ēicitur. Sed quae ex homine per ōs exeunt, ea ex corde proficiāscentia, coinquīnant hominem. Hinc nāscantur malevolentiae, hinc adulteria, hinc stupra, caedēs, furta, falsa testimōnia, sordēs, mālitiae, dolus, prōtervitās, invīdentia, maledīcta, superbia, stultitia. Haec tam multa intrīnsecus manentia, polluunt hominem. At illōtīs manibus cibum capere, nōn polluit hominem.