Exercitatio - Colloquium Tertium

Exercitatio - Colloquium Tertium

DEDUCTIO AD LUDUM

Persōnae:
Puer, Mater, Pater, Isabellula

Puer

Salvus sīs mī Pater, salvē mea mātercula, precor vōbīs fēlīcem hunc diem germānulī, propitium vōbīs optō Chrīstum sororculae.

⟵ Previous Next ⟶

DEDUCTIO AD LUDUM Personae Pater, Philoponus ludimagister, Propinquus Pater Signa te sacro signo Crucis. Duc nos Iesu Christe sapientissime dementes, potentissime imbecilles. Quaeso, mi Propinque, tu qui es versatus in studiis litterarum, ecquis est in hoc gymnasio optimus institutor puerorum? Propinquus Doctissimus quidem Varro, sed diligentissimus et vir probissimus Philoponus⁽¹⁾, nec eruditionis aspernandae. Habet Varro scholam frequentissimam, et domi numerosum gregem contubernalium. Philoponus non videtur delectari turba, paucioribus est contentus. Pater Hunc malo. Ellum in porticu gymnasii inambulantem. Fili, hoc est formatorium et quasi officina hominum et hic artifex formandi. Adsit tibi Christus, Magister. Aperi caput puer, et flecte poplitem dextrum, sicuti es edoctus: Sta jam rectus. Philoponus Prosperus sit nobis omnibus tuus adventus, ecquid rei est? Pater Hunc filiolum meum ad te adduco, ut ex belua hominem facias. Philoponus Dabo in eam rem operam sedulam. Fiet, revertetur ex pecude homo, ex nequam frugi, et bonus, id vero ne dubitaveris. Pater Quanti doces? Philoponus Si puer bene proficiat, vili: sin parum, caro. Pater Acute hoc dicis, et sapienter, ut omnia. Partiamur inter nos igitur hanc curam: tu ut sedulo instituas, ego ut benigne compensem tuam operam. (1) Philoponus, penultima brevi, id est, industrius, diligens, laboris amicus; aptum sane nomen Institutori puerorum.