Exercitatio - Colloquium Tertium

Signa tē sacrō signō Crucis. Dūc nōs Iēsū Christe sapientissimē dementēs, potentissimē imbecillēs. Quaesō, mī Propinque, tū quī es versātus in studiīs litterārum, ecquis est in hōc gymnasiō optimus institutor puerōrum?

Doctissimus quidem Varrō, sed diligentissimus et vir probissimus Philoponus⁽¹⁾, nec eruditiōnis aspernandae. Habet Varrō scholam frequentissimam, et domī numerōsum gregem contubernālium. Philoponus nōn vidētur delectārī turbā, paucioribus est contentus.

Hunc malō. Illum in porticū gymnasiī īnambulāntem. Fīlī, hoc est fōrmātōrium et quāsī officīna hominum et hic artifex fōrmandī. Adsit tibi Christus, Magister. Aperī caput puer, et flecte poplitem dextrum, sīcut es edoctus: Stā iam rectus.

Prosperus sit nōbīs omnibus tuus adventus, ecquid reī est?

Hunc fīliolum meum ad tē addūcō, ut ex bēluā hominem faciās.

Dabō in eam rem operam sedulam. Fiet, revertētur ex pecude homō, ex nequam frugi, et bonus, id verō nē dubitāveris.

Quantī docēs?

Sī puer bene proficiāt, vīlī: sin parum, carō.

Acūtē hoc dicis, et sapienter, ut omnia. Partiāmur inter nōs igitur hanc cūram: tū ut sedulō institūās, egō ut benignnē compēnsem tuam operam.