Progymnasmata Latinitatis - Prōgymnasma Sexāgēsimum Nōnum
Observātor
Persōnae:
Observātor, Athanāsius, Matthaeus, Bonifācius
Observātor, Athanāsius, Matthaeus, Bonifācius
Observātor
Vōs trēs, linguās geritis īmpēnsē līberās et expedītās: loquācitās vōbīs dominatur: meam admonitiōnem contemnitis ac prō nihilō putātis. Ecce in fābulātōrum indicem vōs referō. Sī (1)Pēgasō velōciōrēs sītis, numquam hodiē effugiētis īnfortūnium.
Athanāsius
Connīvistī aliās, connīve nunc etiam, et mūtā istam mentem, rogō: tacēbō deinceps ut piscis.
Matthaeus
Sī nōmina nostra in catalogum retuleris, erit mihi, quod Praeceptōrī dē tē narrem.
Observātor
Quid dīcēs?
Matthaeus
Cognōscēs.
Observātor
Mīnās iactāre cuīvīs obvium est.
Matthaeus
Experiēris.
Observātor
Nūllīus in mē maleficiī crīmen admīsī, cuius mē stimulet cōnscientia.
Matthaeus
Sentiēs.
Observātor
Nūllum, inquam, crīmen incurrī, quā tū mē arcesās: et nōn ignōrō technās tuās.
Matthaeus
Vidēbis.
Bonifācius
Nē scrībe nōmen meum in tabulā, dōnābō tibi quidpiam.
Observātor
Egone ut patiar mē abs tē corrumpī mūneribus?
Bonifācius
Lepidissimum est.
Observātor
Nōn cūrō.
Bonifācius
Simul aspexeris, appetēs.
Observātor
Mitte nūgārī: nihil habēs quod dōnēs.
Athanāsius
Habet certē.
Observātor
Quīn ostendis?
Bonifācius
Ecce imāgō longē venustissima: augustissima Deī māter puerum IĒSUM ulnīs sustinēns. Vidētis ut amābiliter arrīdet nōbīs dīvīnissimus atque bellissimus īnfāns?
Observātor
Hanccine datūrus es?
Bonifācius
Datūrus, sī pollicēre silentium.
Observātor
Polliceor, dā.
Bonifācius
Quaerēs fēlīciter ambōbus ēveniat, accipe.
Matthaeus
Ō factum bene, iam tū incorruptissimē observātor nec mē, nec Athanāsium audēbis accūsāre.
Observātor
Quāprōpter nōn audērem?
Athanāsius
Quia nōs tē accūsārēmus, et tū pendērēs poenās nōn levēs, quod Praeceptōrī īnfīdēlis ac perfidus extitissēs.
Observātor
Īgnōscō vōbīs similiter, ut Bonifāciō.
Matthaeus
Perplacet. Discēde iam hinc, observā aliōs.
Athanāsius
Prō, quantum bonī adeptī sumus hāc lūce, quī ab istō quidem Observātōre quoad voluērimus tūtī sīmus?
Bonifācius
Quīnam?
Athanāsius
Sī dē frāctā lēge silentiī postulāre quemquam ē nōbīs meditābitur, obiiciēmus illī, quam abs tē accipere nōn recūsāvit ēlegantem pictūram ut sīlēret: mūtīre nōn audēbit. Nam tribus, tibi quī dōnāstī, mihi et Matthaēō testibus oculātīs plūs utique quam illī sōlī vel iūrātō crēdet Magister: periūrissimum dīcet, sī dēiērāverit.
Matthaeus
Via reperta est commodissima ad ēvadenda verbera, propter istam congressiōnem nostram vidēlicet imminentia. Vah.
(1) Pēgasō velōciōrēs: Dē equō alātō, quī capite Medūsa ampūtātō ā Perseō, ex eius sanguine nātus repente prosiluerit, quōmodo eō ūsus sit Bellerophōn, Nātālis Comes Mytholog. lib.7. cap.11. et lib.9. cap.4. Fābulantur hunc eundem equum, cum terram ungulā percussisset, fontem ēlicuisse, unde ipsī nōmen inditum Pēgasus, πήγη enim fōns: quī quoniam Mūsīs cōnsecrātus est, dīcuntur illae Pēgasidēs. Īdem fōns ἱπποκρήνη, et Mūsae Hippōcrēnidēs.