Paedalogia - Dialogus Decimus Quīntus

Tū nōbīscum pilā lūdēs, Friderice? An cum istīs cursū māvīs certāre?

Māllem cum ūnō et alterō iūcundō sodālī dēambulātum īre.

Quīn tū ante paulisper pīlā collūdis? Posteā et nōs ūnā tēcum dēambulābimus.

At ego huiusce lūdī nōn admodum sum perītus, nam nec cautē pilam mittere nec missam manū satis certā excipere sufficiō.

Nihil est, quod hāc grātiā sīs sollicitus: ipsa reī exercitātiō tē satis quid factō opus sit admonēbit. Quod sī hinc modīs omnibus abhorrēs, age lūdum minōris negōtiī, nempe globulārem incipiāmus.

Quandō ita vultis, nōn recūsō, tametsī praeter rīsum spectantium nihil mē lucrātūrum sciō. Siquidem ubi deciēs aberrārō, vix semel tandem feriō idque cāsū magis quam arte.

Nōn magnī refert in hōc certāmine, vincās an vincāris; neque enim caput agitur aut prō pecūniā certātur.