Paedalogia - Dialogus Alter et Vīcēsimus

Quid crās sit futūrum audīstīn'?

Nihil equidem, nisi quae aliās fierī cōnsuēvērunt.

Dē spectāculīs nihil?

Nihil plānē; num edentur aliqua?

Edentur et quidem varia. Nam fūnambulōs duōs adesse audiō, quī crās suī artificiī mīrāculum ostentābunt. Tum Sarmatās aliquot vīdī ipse, quī immānēs ursōs ad exiguam stipem iuxtā lituōrum cantūs saltitantēs exhibēbunt.

Cūrābō quōquō modō, ut et ipse intersim, etiamsī mē ipse intrūdere dēbeam.

Vix poteris, quandōquidem quī nōn numerant forās quatiuntur.

Fallam ipsōs iānitōrēs.

Ad haec prīnceps ipse in forō pariā aliquot equitum exhibēbit, quī inter sēsē īnfēstīs hastīs concurrent. Post quōs circum ingredientur item equitēs ā calce ad verticem usque armātī, quōs cataphractōs vocant. Hī catervātim sine ūllō aut ōrdine aut arte alius in alium irruent et sē mūtuīs ictibus ab equīs dēicient. Nam in hōc circus undique est circumsaeptus et, nē quī ceciderint gravius laedantur, fimō īnstrātus.

Quam quaesō tē voluptātem ex tam furiōsō et minimē iūcundō certāmine capiunt istī?

Quid? Nūllās nōn lautitiās prae hāc voluptāte contemnunt, praeterquam quod hōc tīrōciniō ad sēriōs hostium congressūs praeparantur et quasi animantur.

Utcumque sit, spectābō et ipse, quōmodo rēs agātur.