Paedalogia - Dialogus Alter et Trīcēsimus
Leopoldus et Sevērus dē spectāculīs cōmoediārum tragoediārumque exhibendīs fābulantur.
Persōnae
Leopoldus, Sevērus
Leopoldus, Sevērus
Leopoldus
Scīs, Sevēre, quae spectācula diē crāstinō, quī est ā fēriīs sacrātissimī corporis Chrīstī octāvus, ēdī
cōnsuēverint?
Sevērus
Quī ipse scīre possem, cum superiōrī annō nōn adfuerim?
Leopoldus
At audīsse ex aliīs poterās.
Sevērus
Quae ad mē parum attinent, ea nōn magnopere soleō exquīrere. Sed dīc, ōrō: quid tandem est, quod iactās?
Leopoldus
Tragoediam eōrum cruciātuum, quōs prō nōbīs tulit servātor Chrīstus, histriōnēs agent; sunt enim ad hoc
dēlēctī aliquot.
Sevērus
Quaesō tē: omnibus etiam adhibitīs persōnīs?
Leopoldus
Omnibus omnīnō.
Sevērus
Ipse in hāc fābulā māllem dūrissimī mīlitis aut carnificis persōnam gerere quam ipsīus Chrīstī; nam tametsī,
ut conicere possum, rēs fictē repraesentābitur, sīc tamen abīre nōn potest, quīn is, quī Chrīstum refert,
multās interim molestiās in sē recipere cōgātur.
Leopoldus
Et ipse in hāc fābulā spectātor esse mālō quam āctor, utcumque rēs interim agātur sēria.