Hortulus Puerorum - Colloquium Primum
Lūdus Monopodiī
Ioannes Fontanus. Hortulus puerorum pergratus ac perutilis Latine discentibus.
Ed. Loys and Charles Pesnot. Lyon. Loys and Charles Pesnot. 1561.
Source: Stoa.org
This version created by Meagan Ayer for Dickinson College Commentaries, 2024.
Ioannes Fontanus. Hortulus puerorum pergratus ac perutilis Latine discentibus.
Source: Stoa.org
This version created by Meagan Ayer for Dickinson College Commentaries, 2024.
Ioannes Fontanus. Hortulus puerorum pergratus ac perutilis Latine discentibus.
Persōnae
Petrus, Philippus, Balthasar
Petrus, Philippus, Balthasar
Petrus
Sed quōnam lūsūs genere recreābimur?
Philippus
Mihi quidem mīrum in modum placet lūdere pār impār cerasiōrum nucleīs aut dīruere
extruereque turrēs.
Petrus
Papae! Vīn’ violāre foedus paucīs ante diēbus compositum? An hostīlium tubārum clangōrem
nōbīs nūnciās? Ego omnia in tranquillitāte et quiēte positā esse exīstimābam ac in
utramque aurem dormiendum.
Philippus
Ha, ha, hae, quam in rē rīdiculā attonitum sēsē arguit: turrēs vocō mōre gallicō
castella nucum. Cum sibi suppositīs additur ūna tribus.
Petrus
Relinquāmus huiusmodī lūsus gallicīs puerulīs, ego mālō in scrobem iaculārī.
Balthasar
Absit, nam is lūdus vīlis est, sordidīs proprius nec decēns ingenuōs, praetereā
praeceptōrī nōn admodum grātus.
Petrus
Nesciō quem sphaerae lūdum ē Belgicā meditātus est praeceptor noster.
Philippus
Hoc fortasse aliās, nunc monopodiō ūtendum.
Balthasar
Id omnēs dēlectābit. Sed quis erit monopus?
Petrus
Sortiāmur. Bene sors, ut optābam, cecidit: Philippō necesse est esse monopodī.
Philippus
Agite, eā tamen lēge ut caput līberum sit et intāctum. Fugite, nam quī tangētur
in meās partēs succēdet.
Petrus
Bone Deus, quam agilis est et singulārī pernīcitāte nōs prōsequitur.
Balthasar
Vidētur eī proprium ita ambulāre ut indīs monopodibus.
Philippus
Cecidistī (tetigistī?) aurem, Petre, cum eā sit in capite: nōn inpūne ferēs,
modo tē assequar. Hem, humerum percussī.
Petrus
Ō gravem ictum! Quid? Geminās verber: Ego aufugiō antequam convolent ūniversī.
Balthasar
Petre, accurre mēcum dīgladiātūrus.
Petrus
Nunquam recūsāvī monomachiam. Hem, attigī scapulās.
Balthasar
Ego fugā meae salūtī cōnsulam.
Petrus
Cēdō ad tempus.